Berlın áýejaıynyń jumysy dronǵa baılanysty ýaqytsha toqtatyldy

ASTANA. KAZINFORM — Germanııa astanasynda birneshe reıs keshiktirilip, ushaqtar basqa áýejaılarǵa baǵyttaldy, dep habarlaıdy TASS.

Ushqyshsyz ushaqtyń saldarynan Vıllı Brandt atyndaǵy Berlın-Brandenbýrg halyqaralyq áýejaıynyń jumysy ýaqytsha toqtaldy. Biraz reıs basqa áýejaılarǵa baǵyttaldy. Sonymen qatar ushaqtardyń ushyp-qonýynda keshigý baıqaldy. Atap aıtqanda, Bazel, Oslo jáne Barselonaǵa reıster keshiktirildi. London, Bırmıngem, Manchester, Stokgolm, Helsınkı jáne Antalııadan ushaqtar basqa áýe aılaqtaryna baǵyttaldy.

Brandenbýrg polıtsııasy ókiliniń aıtýynsha, áýejaı mańyndaǵy dron týraly eń aldymen bir adam habarlaǵan. Ushqyshsyz ushaqty patrýldik mashınanyń ekıpajy da baıqady. Alaıda, apparattyń ornalasqan jerin anyqtaý múmkin bolmady.

— Sońǵy aılarda drondar Germanııanyń azamattyq nysandarynyń jumysyn birneshe ret buzdy, — delingen aqparatta.

Eldiń ishki ister mınıstri Aleksandr Dobrındttiń aıtýynsha, 26 qyrkúıekke qaraǵan túni Shlezvıg-Golshteın aspanynda drondar toby baıqalǵan. 3 qazanda Mıýnhen áýejaıy birneshe ushqyshsyz ushaqtardyń kórinýine baılanysty jumysyn toqtatqan. Sol kúni federaldy polıtsııanyń anyqtaý júıesi Maındaǵy Frankfýrt áýejaıynyń batys bóligindegi áýe keńistiginiń buzylýyn tirkedi.

Aıta keteıik, Sırııanyń ońtústigindegi Es-Sýveıda turǵyn alqabyn drondar shabýyldady.