Berlın áýejaıynda mıgranttardy jedel deportatsııalaý ortalyǵy ashyldy
ASTANA. KAZINFORM — Berlın Brandenbýrg áýejaıynda elden pana suraýshylarǵa arnalǵan jańa ortalyq jumysyn bastady. Bul ortalyq mıgranttardy jedel túrde deportatsııalaý rásimderin júzege asyrýǵa baǵyttalǵan, dep habarlaıdy DW.
Ortalyq reformalanǵan Jalpyeýropalyq pana berý júıesi (CEAS) júzege asyrylǵannan keıin ashyldy. Jańa júıe jekelegen sanattaǵy ótinishterdi qaraýdy jedeldetýge jáne ótinish qabyldanbaǵan jaǵdaıda úmitkerlerdi elden jedel shyǵarý sharalaryn uıymdastyrýǵa baǵyttalǵan.
Ortalyqta jeke basy týraly jalǵan aqparat bergen, sondaı-aq ulttyq qaýipsizdikke qaýip tóndirýi múmkin tulǵalardyń isteri qaralady.
Jedeldetilgen rásim halyqaralyq qorǵaý sırek beriletin elderdiń azamattaryna da qoldanylady.
Eger pana berý týraly ótinish qabyldanbasa, ótinish berýshi qaraý rásimi aıaqtalǵannan keıin birden deportatsııalanýy múmkin. Qaraý protsesi 12 aptadan aspaıdy.
Adamdardy ornalastyrý úshin áýejaı aýmaǵyna jaqyn jerde bólek ǵımarat jabdyqtalǵan. Brandenbýrg federaldyq jeriniń Іshki ister mınıstrliginiń málimetinshe, ortalyq bir mezette 40 adamǵa deıin qabyldaı alady. Osyndaı ortalyqtar buǵan deıin Gessen, Baden-Vıýrtemberg jáne Bavarııa federaldyq jerlerinde de jumys istep keledi.
Jalpyeýropalyq pana berý júıesi (CEAS) Eýropalyq Odaqtyń barlyq elderinde kúshine endi. Onyń maqsaty — kóshi-qon úderisterin retteý, ótinishterdi qaraýdy jedeldetý jáne pana izdeýshilerdi odaq elderi arasynda tıimdi bólý.
Aıta keteıik, Frantsııada ımmıgratsııany shekteý usynyldy. Sondaı-aq Ońtústik Afrıka bıligi zańsyz mıgratsııany aýyzdyqtaýdyń 5 tarmaqty josparyn usyndy.
Buǵan deıin Donald Tramp AQSh Іshki qaýipsizdik departamentiniń ımmıgratsııalyq qyzmetin 70 mıllıard dollarǵa qarjylandyrý týraly zań jobasyna qol qoıǵany týraly habarladyq.
