Berlın-Almaty charterlik reısiniń 7 jolaýshysynan koronavırýs tabyldy
ALMATY. QazAqparat - «Berlın-Mınsk-Almaty» charterlik reısiniń 12 jolaýshysynyń jeteýinen koronavırýs tabyldy. Olardyń arasynda bortserik áıel de bar, dep habarlaıdy QazAqparat tilshisi.
Bul týraly búgin onlaın brıfıng barysynda qalalyq taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaqasymova aıtty.
Onyń aıtýynsha, bort 13 naýryzda ushyp kelgen.
«Bul bort kelisimen biz ınfektsııalyq statsıonarǵa oqshaýladyq. Bortta bolǵan 12 adamnyń barlyǵy: 9 jolaýshy men 3 ekıpaj múshesi jeke boksqa jatqyzyldy. 12 adamnyń jeteýinen koronavırýs tabyldy. Onyń ishinde bortserik áıel bar. Olar qoǵamǵa qaýip tóndirmeıdi. Sebebi, aýrý oshaǵy der kezinde zalalsyzdandyrylyp úlgerdi», - dedi A.Moldaqasymova.
Aıta ketý kerek, qazir Qazaqstanda 79 koronavırýs juqtyrý jaǵdaıy tirkelgen.
Nur-Sultan qalasynda – 41 adam, Almatyda – 31 adam, Qaraǵandyda - 2, Almaty oblysynda - 1, Aqtóbe oblysynda – 1, Shymkentte - 1, Jambyl oblysynda - 1, Soltústik Qazaqstan oblysynda - 1 adam aýrý juqtyrǵan.
