Berlın 2036 jylǵy Olımpıadany ótkizýge úmitker bolýdan bas tartpaq
ASTANA. KAZINFORM – Berlın bıligi 2036 jylǵy Olımpıada jáne Paralımpıada oıyndaryn ótkizýge Germanııa atynan úmitker bolý úshin bergen ótinimin keri qaıtaryp almaq, dep habarlaıdy DW.
Berlınniń Olımpıada máseleleri jónindegi ýákili Kave Nırýmand, qala býrgomıstri Kaı Vegner jáne sport isteri jónindegi senator Irıs Shpranger ótinimdi keri qaıtaryp alý týraly sheshim qabyldaǵan.
Osydan keıin Germanııa atynan Olımpıada jáne Paralımpıada oıyndaryn ótkizýge úmitker mártebesi úshin Mıýnhen men Keln/Reın-Rýr óńiri ǵana talasady.
Berlın Olımpıadaǵa «Berlin+» tujyrymdamasymen Brandenbýrg, Meklenbýrg-Aldyńǵy Pomeranııa jáne Saksonııamen birge ótinim bergen edi.
– Germanııanyń Olımpıadalyq sport odaǵynyń baǵalaý komıssııasy Mıýnhen men Keln/Reın-Rýr jobalaryna Berlınniń tujyrymdamasyna qaraǵanda joǵary baǵa bergen. Sonymen qatar Berlınde Olımpıada ótkizý týraly ótinim boıynsha referendým bolǵan joq, – delingen málimette.
Germanııa atynan Olımpıadaǵa qaı qala nemese óńir úmitker bolatyny 26 qyrkúıekte Baden-Badende anyqtalady. Daýys berýge 42 olımpıadalyq sport federatsııasy, sondaı-aq Germanııanyń Olımpıadalyq sport odaǵynyń prezıdıýmy men jeke músheleri qatysady.
Odan keıin tańdalǵan nemis úmitkeri Halyqaralyq Olımpıada komıteti aıasyndaǵy irikteýge qatysady. 2036 jylǵy Olımpıada oıyndarynyń ótetin orny týraly sheshim úsh jyldan keıin qabyldanbaq.
Aıta keteıik, Rım 2036 nemese 2040 jylǵy Olımpıadany ótkizýge ótinim beretini habarlandy.
