Qazaqstandyq elektrmonterler halyqaralyq baıqaýda top jardy
ASTANA. KAZINFORM — Astana emes, Ankarada ótken halyqaralyq baıqaýda Qazaqstannyń elektrmonterler quramasy túrki elderiniń mamandaryn basyp ozyp, birinshi orynǵa ıe boldy. Sonymen qatar qazaqstandyq mamandar «Eń tabysty komanda» arnaıy nomınatsııasymen marapattaldy. Bul týraly Energetıka mınıstrligi málim etti.
21–23 qyrkúıekte Ankarada «Túrki memleketteri uıymyna múshe elderdiń 2026 jylǵy elektr energııasyn taratý jelisindegi úzdik komandasy» halyqaralyq baıqaýy ótti. Jarysqa Túrki memleketteri uıymyna qatysýshy elderdiń energetıka salasynyń ókilderi qatysty.
Saıysqa Túrkııa, Ázerbaıjan, Qyrǵyzstan, Ózbekstan, Qazaqstan, Vengrııa jáne Túrikmenstannyń energetıka salasynyń ókilderi qatysty.
Qazaqstan atynan Energetıka mınıstrligi jasaqtaǵan qurama komanda qatysty. Onyń quramyna Shymkent qalasynyń «Ońtústik Jaryq Tranzıt» JShS jáne Aqtóbe oblysynyń «Energosıstema» JShS mamandary kirdi.
Jarys qorytyndysy boıynsha Qazaqstan quramasy birinshi orynǵa ıe bolyp, kásibı daıarlyqtyń, praktıkalyq daǵdylardyń jáne komandalyq jumystyń joǵary deńgeıin kórsetti.
Sonymen qatar qazaqstandyq komanda «Eń tabysty komanda» arnaıy nomınatsııasymen marapattaldy.
Saıys TEDAŞ oqý bazasynda ótip, elektr qondyrǵylarymen jumys isteý boıynsha kásibı daǵdylardy, sondaı-aq qaýipsizdik jáne taratý jelilerin paıdalaný talaptaryn praktıkalyq turǵyda kórsetýge baǵyttaldy.
Baıqaý barysynda qatysýshylar taratý transformatorynyń aqaýly joǵary kerneýli saqtandyrǵyshyn aýystyrý boıynsha praktıkalyq tapsyrmany oryndady. Tapsyrma tómen jáne orta kerneý jaǵdaıynda operatsııalardy retimen oryndaýdy, jergilikti jerge qosýdy, saqtandyrǵyshty aýystyrýdy jáne qaýipsizdik talaptaryn saqtaýdy qamtydy.
Qatysýshylardyń jumysyn halyqaralyq tóreshiler alqasy baǵalady. Nátıjelerdi anyqtaý kezinde operatsııalardyń durys oryndalýy, eńbekti qorǵaý talaptarynyń saqtalýy, tapsyrmany oryndaý ýaqyty, sondaı-aq tıimdi ári zamanaýı tehnıkalyq sheshimderdi qoldaný eskerildi.
Qazaqstannyń halyqaralyq jarysqa qatysýy Túrki memleketteri uıymyna qatysýshy elderdiń energetıka salasy mamandary arasynda kásibı tájirıbe almasýǵa múmkindik berip, qazaqstandyq elektr monterleriniń kásibı deńgeıin halyqaralyq arenada tanytty.
Aıta keteıik, Qazaqstanda óndirilgen elektr energııasy artyp keledi.
