Berlın 2024 ne 2028 jylǵy jazǵy oıyndardy ótkizý quqyǵyn jeńip alýǵa áreket jasamaq
ASTANA. QazAqparat - Berlın Senaty 2024 nemese 2028 jylǵy jazǵy oıyndardy ótkizý quqyǵyna jeńip alý úshin kúresýge daıyn ekendigin jarııalady.
Sheteldik BAQ-tyń aqparatyna qaraǵanda, bul týraly Germanııa astanasynyń basshysy Klaýs Voveraıt málim etken.
Atalǵan jyldary Olımpıada ótkizý úshin Berlınnen bólek Gambýrg qalasy da úmitker bolyp otyr. Germanııanyń osy eki qalasy da óz tujyrymdamalaryn birinshi qyrkúıek kúni usynatyn bolady. Osy aıdyń sońyna deıin úmitker qalalar Nemis Olımpıada sporttyq odaǵyna osynaý baıraqty básekege qatysty týyndaǵan barlyq saýaldaryna tyńǵylyqty jaýap berýi tıis.
Seısenbi kúni ótken Berlın Úkimetiniń otyrysynda Nemis Olımpıada sporttyq odaǵynyń saýaldaryna qatysty 13 jaýap túzildi. Ol osy jeksendi kúni atalǵan uıymǵa tabys etilýi tıis.
«Biz jan-jaqty jaýaptardy ázirledik. Ótinim (Berlınde Olımpıada oıyndaryn ótkizý ótinimi) halyqtyń tolyq qoldaýyna ıe bolyp otyr», - dedi Klaýs Voveraıt.
Aıta keterligi, NOSO jazǵy oıyndar ne Berlınde, ne Gambýrgte ótetindigine qatysty sońǵy sheshimin 6 jeltoqsan kúni qabyldaıtyn bolady.
Aıta keterligi, buǵan deıin Germanııa úsh márte olımpıada oıyndaryn ótkizgen bolatyn.
