Berik Ýálı Semeıdegi úsh deneshynyqtyrý-saýyqtyrý kesheniniń qurylys barysymen tanysty
SEMEI. KAZINFORM – Oblys ákimi Berik Ýálı Semeı qalasyndaǵy birqatar nysandy aralady. Aımaq basshysy Bobrovka kentinde jeke ınvestıtsııa esebinen salynyp jatqan dene shynyqtyrý-saýyqtyrý kesheniniń qurylysymen tanysty.
10 myńǵa tarta halyq turatyn Bobrovka jáne Murat turǵyn úı alaptarynda zamanaýı sporttyq jáne áleýmettik nysandar jetkiliksiz. Eki qabatty nysanda jalpy aýdany 720 sharshy metrdi quraıtyn oıyn jáne kúres zaldary qarastyrylǵan. Qurylysy bıyl mamyr aıynda bastalǵan nysan jeltoqsanda paıdalanýǵa berilmek.
Oblys ákimi merdigerlerge jumysty sapaly ári merziminde aıaqtaýdy tapsyrdy.
– Bul keshende tek Bobrovka turǵyndary ǵana emes, jaqyn mańdaǵy «Murat» saıajaıyndaǵy halyq ta sportpen shuǵyldanatyn bolady. Qazirgi ýaqytta qalamyzda dál osyndaı sport nysany Vodnyı kentinde de salynyp jatyr. Bul – shahardyń shetkeri aýdandarynyń turǵyndary úshin salaýatty ómir saltyn ustanyp, buqaralyq sportpen aınalysýyna múmkindik beredi, - dedi aımaq basshysy.
Vodnyı kentindegi deneshynyqtyrý-saýyqtyrý kesheniniń qurylysy qazirgi ýaqytta 70 paıyzǵa aıaqtalǵan. Nysandy jyl sońyna deıin paıdalanýǵa berý josparlanyp otyr.
Sonymen qatar Ushaqtar shaǵyn aýdanynda «Samuryq qazyna» ál aýqat qory men Abaı oblysy ákimdiginiń birlesken jobasy sporttyq saýyqtyrý kesheniniń qurylysy júrgizilip jatyr. Jalpy aýmaǵy 1 770 sharshy metrdi quraıtyn nysan 1,1 gektar aýmaqta boı kóteredi.
Keshen eki korpýstan turady jáne bir mezette 115 adamǵa deıin qabyldaı alady. Munda 11 ústelge arnalǵan tennıs zaly, kúres, zamanaýı jattyǵý zaldary, fýtbol alańdary qarastyrylǵan. Sport ǵımaratyn keler jyldyń qyrkúıek aıynda paıdalanýǵa berý josparlanyp otyr.