Berik Ýálı Abaı oblysynyń damý josparyn tanystyrdy

SEMEI. KAZINFORM - Semeıdegi Abaı teatrynda oblys ákimi Berik Ýálıdiń tóraǵalyǵymen óńirdiń aldaǵy jyldardaǵy damýyna arnalǵan jıyn ótip jatyr, dep habarlaıdy Abaı oblysynyń ákimdiginiń baspasóz qyzmeti.

Aımaqtyń bilim, densaýlyq saqtaý, mádenıet, sport, áleýmettik, bıznes salasynyń ókilderi, depýtattar, quqyq qorǵaý organdarynyń jetekshileri, joǵary oqý oryndarynyń basshylary qatysýda. Mańyzdy shara oblystyń barlyq aýdandarynda ıýtýb jelisi arqyly kórsetilýde.

Aımaq basshysy jıyndy ashqan sózinde Prezıdenttiń oblysty qurý týraly sheshimi shyn máninde tarıhı ádildiktiń saltanat qurýy ekenin atap ótti.

- Oblys qurylǵan sátten bastap óńirimizdiń áleýmettik-ekonomıkalyq damýy Memleket basshysynyń tikeleı baqylaýynda. Ózderińizge belgili, bıyl biz Abaı Qunanbaıulynyń 180 jyldyq is-sharasyn atap ótemiz. Úkimet bul baǵyttaǵy kóptegen jumystardy qolǵa alyp jatyr. Іs-sharaǵa daıyndyqty qazirden bastadyq, joǵary deńgeıde ótkizýge atsalysý oblysymyzdyń árbir turǵynynyń mindeti dep bilemin,- dedi oblys ákimi.

Aımaq basshysy oblys ákimi retinde qyzmetke kirisken úsh aı ýaqyt aralyǵynda óńirdiń barlyq aýdan, qalalaryn, buryn aýdan ortalyqtary bolǵan Shar qalasynda, Barshatas, Taskesken jáne Qaınar aýyldarynda, jalpy sany 68 eldi mekende bolyp, turǵyndardyń tynys tirshiligimen, ózekti máselelerimen tanysty.

- Biz oblystyń tranzıttik áleýetin jáne geografııalyq erekshelikterin eskere otyryp, aldaǵy úsh jylǵa damý josparyn aıqyndap, damýdyń negizgi baǵyttaryn belgiledik. Óńirdiń óndiristik, et, sút klasterin qurý men sýarmaly eginshilik áleýetin arttyrýǵa, ishki týrızmdi, áleýmettik salany damytýǵa, jol jáne ınfraqurylym júıelerin jańartýǵa basymdyq beriledi, - dedi oblys ákimi.

Osyǵan deıin Abaı oblysy qaıta qurylǵannan beri Úkimet rezervinen 44,3 mlrd teńge alǵany týraly jazdyq.