Berik Terlikbaev Abaı oblysy Jarma aýdanynyń ákimi bolyp taǵaıyndaldy
ASTANA. KAZINFORM — Búgin aımaq basshysy Berik Ýálı Jarma aýdanynyń aktıvine aýdannyń jańa ákimin tanystyrdy.
Jańa Konstıtýtsııanyń qabyldanýyna baılanysty «Qazaqstan Respýblıkasyndaǵy saılaý týraly» Konstıtýtsııalyq zańyna tıisti ózgerister engizildi. Atalǵan ózgeristerge sáıkes oblystyq mańyzy bar qalalar men aýdandar ákimderin saılaý ınstıtýty joıyldy. Qazirgi ýaqytta oblystyq mańyzy bar qalalar men aýdandardyń ákimderin Qazaqstan Respýblıkasynyń zańnamasynda belgilengen tártippen oblys ákimderi tıisti máslıhattardyń kelisimimen taǵaıyndaıdy.
«Qazaqstan Respýblıkasynyń memlekettik qyzmeti týraly» Zańynyń 25 babyna sáıkes Qazaqstan Respýblıkasynyń Prezıdent Ákimshiliginiń, Jarma aýdany máslıhat depýtattarynyń kelisimimen jáne oblys ákiminiń ókimimen Jarma aýdanynyń ákimi laýazymyna Berik Terlikbaev taǵaıyndaldy.
Aıta keteıik, bul — jańa Konstıtýtsııa qabyldanǵannan keıingi Abaı oblysyndaǵy úshinshi aýdan ákiminiń taǵaıyndaýy.
— Jarma aýdany — Qalba taýynyń sileminde, toǵyz joldyń torabynda ornalasqan qasıetti de qutty meken. Oblysymyzdyń áleýmettik-ekonomıkalyq damýynda ózindik orny bar, strategııalyq mańyzy joǵary aýdandardyń biri. Jarma aýdanynyń áleýmettik-ekonomıkalyq damýy, turǵyndardyń ál-aýqatyn arttyrý jáne eldi mekenderdiń ınfraqurylymyn jaqsartý máseleleri bizdiń turaqty nazarymyzda. Óńir ekonomıkasyn nyǵaıtyp, halyqtyń turmys sapasyn jaqsartý baǵytynda naqty jumys jasaýymyz qajet. Bul jumystardyń bárin júıeli jolǵa qoıyp, memlekettik baǵdarlamalardy sapaly jáne laıyqty júzege asyrý asa mańyzdy jumys ekeni sózsiz. Berik Serikqanulyn ózderińiz jaqsy bilesizder. Tájirıbesi jetkilikti. Bıylǵy 12 mamyrdan bastap aýdan ákiminiń orynbasary, aýdan ákiminiń mindetin atqarýshy qyzmetin atqardy. Osy kezeńde aýdannyń áleýmettik-ekonomıkalyq jaǵdaıymen jaqsy tanysyp, óziniń tájirıbesi men uıymdastyrýshylyq qabiletin kórsete bildi. Sondyqtan artylǵan senimdi aqtap, Jarma aýdany jurtshylyǵymen birlese otyryp, osy aýdannyń odan ári damýyna, gúldenýine bar kúsh-jigerin salyp, aıanbaı qyzmet etedi dep senemin, — dedi Berik Ýálı.
Berik Serikqanuly Úrjar aýdanynyń Qaraqol aýylynda dúnıege kelgen. Eńbek jolyn jumysshy bolyp bastap, keıin kásipkerlik jáne memlekettik qyzmet salalarynda eńbek etti. Aıagóz aýdanynda ekonomıka, salyq, statıstıka jáne turǵyn úı-kommýnaldyq sharýashylyq baǵyttarynda jaýapty qyzmetter atqardy. Kóp jyl boıy statıstıka salasynda basshylyq qyzmetterde eńbek etti. Shyǵys Qazaqstan oblysy boıynsha statıstıka basqarmasy basshysynyń orynbasary, Ulttyq statıstıka bıýrosynyń Shyǵys Qazaqstan oblysy boıynsha departamentiniń, keıin Abaı oblysy boıynsha departamentiniń basshysy boldy. 2026 jylǵy 12 mamyrdan bastap Jarma aýdany ákiminiń orynbasary, aýdan ákiminiń mindetin atqarýshy qyzmetin atqardy.
