Berik Sultan: Qazaqstanda kásipqoı boks joǵary deńgeıde damyǵan

ASTANA. KAZINFORM — Qazaqstandyq kásipqoı boksshy Jánibek Álimhanulynyń PR-menedjeri Berik Sultan Kazinform tilshisine qazaqstandaǵy kásipqoı bokstyń deńgeıi týraly óz oıymen bólisti.

Berik Sultannyń aıtýynsha, Qazaqstannan osyǵan deıin kásipqoı boksta birneshe álem chempıony shyqqan.

– Meniń oıymsha, bizdiń elimizde kásipqoı boks joǵary deńgeıde damyǵan. Eger olaı bolmaǵanda chempıondar shyqpaıtyn edi. Jánibek elimizdegi tuńǵysh jáne sońǵy álem chempıony emes. Osyǵan deıin aǵalarymyz boldy, keıingi inilerimiz de chempıon bolady. Qazaqty batyr halyq deımiz ǵoı. Osy boksshylarymyz batyrlyǵymyzdy chempıondyqpen dáleldep jatyr, - deıdi ol.

Sondaı-aq, Berik Sultan qazaqstandaǵy promoýterlik kompanııalarǵa baılanysty suraqqa jaýap berip, elimizde ótkiziletin kásipqoı boks keshteri týraly toqtaldy.

– Meniń oıymsha, promoýterlik kompanııalardyń jabylyp qalýy qarjylyq máselege baılanysty bolýy múmkin. Sebebi, kásipqoı boks keshin uıymdastyrý, ony álemdik deńgeıge shyǵarý, shetelden qarsylastar ákelý, olarmen kelisý jáne kóńilin tabý sııaqty kóp jumys bar. Negizi, rıng syrtynda kóp adam bile bermeıtin úlken sharýalar bar. Ádette chempıondardy bylaı qoıǵanda ádettegi qarsylastarmen jekpe-jekke shyǵýǵa kelisý ońaı sharýa emes. Sondyqtan, promoýterlik kompanııalar osy kezde qarjylyq qıyndyqtarǵa tap bolýy yqtımal, - deıdi ol.

Berik Sultannyń pikirinshe, kásipqoı boksshylar jekpe-jek úshin laıyqty qarajat talap etýi oryndy. 

– Shetelden keletin nemese qazaqstandyq boksshylar bolsyn, mańdaı ter tógip eńbek etkennen keıin meıilinshe jaqsy aqsha alǵysy keledi. Sebebi, olar sharshy alańǵa shyǵyp judyryqtasady, odan keıingi jaraqattyń emine jáne kútimge aqsha kerek. Jaraqatyńa jankúıerler de, promoýterlik kompanııa da kómektespeıdi. Keı jaǵdaıda boksshylar ózderi qaltasynan aqsha shyǵaryp emdeledi. Sondyqtan, boksshylar jekpe-jek aldynda durys qarajat talap etýi oryndy, - deıdi Jánibektiń PR-menedjeri.

Aıta keteıik, Búgin Astanadaǵy «Barys Arenada» Jánibek Álimhanulynyń 5 sáýirge josparlanǵan kezekti jekpe-jegine arnalǵan baspasóz máslıhaty ótti. 

Osyǵan deıin habarlaǵanymyzdaı, Týrızm jáne sport mınıstri Erbol Myrzabosynov Jánibek Álimhanulynyń kezekti jekpe-jegi Qazaqstanda uıymdastyrylatynyn aıtqan bolatyn. 

Jánibek Álimhanulynyń 5 sáýir Astana qalasynda judyryqtasatyn qarsylasy frantsýzdyq boksshy — Anaýel Ngamıssengý. Ol osyǵan deıin 14 kezdesý ótkizip, barlyǵynda jeńiske jetken. Onyń 9-yn merziminen buryn jeńgen.