Berik Aıtjanov 60 jastaǵy qarııanyń rólin somdady: «Kúzgi samal» kórermenge jol tartty
ASTANA. KAZINFORM – Mádenıet jáne aqparat mınıstrligi men Ulttyq kınony qoldaý memlekettik ortalyǵynyń qoldaýymen túsirilgen «Kúzgi samal» kórkem fılminiń tusaýkeseri ótti.
Qyrǵyz dramatýrgi Talıb Ibraımovtyń «Qart pen perishte» povesi jelisimen taspalanǵan týyndy adam janynyń arpalysyn, kesh kelgen mahabbat pen jaýapkershilik júgin arqaý etedi.
Fılm rejısseri Ádil Merekeniń aıtýynsha, týyndynyń jaryqqa shyǵýyna marqum jazýshy Talıb Ibraımovtyń shyǵarmasy negiz bolǵan. Jobanyń bas prodıýseri Tasbolat Merkenov bul hıkaıany osydan jeti jyl buryn oqyp, ekrandaýdy armandaǵan.
– Prodıýser maǵan bul jobany osydan bes jyl buryn usynǵan edi, biraq ol kezde sáti túspedi. Tek araǵa ýaqyt salyp, Mádenıet mınıstrligi men Ulttyq kınony qoldaý ortalyǵynyń kómegimen bul kartına júzege asty. Men úshin bul – kareramdaǵy úlken qadam, sondaı-aq zor jaýapkershilik pen qobaljý. Biz jasaǵan ónim kórermenge jetip, óz baǵasyn alǵanyn qalaımyn. Kez kelgen synǵa ashyqpyz, – dedi rejısser Ádil Mereke.
Basty róldi somdaǵan Berik Aıtjanov stsenarııdiń túpnusqadan sál ózgeshelengenin, biraq sonyń arqasynda oqıǵanyń tolyǵa túskenin atap ótti.
– Meniń keıipkerim – 60-tan asqan zeınetker. Akter retinde bul men úshin jańa beles boldy. Fılm Ystyqkólde túsirildi. Mamyrdyń sońy bolsa da, sý óte sýyq edi. Áriptesim Kamıla ekeýmizge sýǵa túsý ońaı soqpady, jıi úzilis jasap, jylynýǵa týra keldi, bul tek tehnıkalyq qıyndyqtar ǵana. Fılmniń negizgi túıini – adam qartaısa da, sezim qartaımaıtyndyǵynda, alaıda sol sezimniń artynda úlken jaýapkershilik bar ekenin umytpaý kerek, – dedi Berik Aıtjanov.
Ulttyq kınony qoldaý memlekettik ortalyǵynyń basqarma tóraǵasynyń orynbasary Ádilet Omarov bul týyndynyń tolyqtaı memleket esebinen qarjylandyrylǵanyn málimdedi. Onyń aıtýynsha, joba barlyq kezeńnen, sonyń ishinde ıÝtýbta tikeleı efırde ótken qorǵaýdan (pıtchıng) ashyq ótken.
– Biz jyl saıyn konkýrs uıymdastyramyz, onda stsenarıılerdi arnaıy saraptama keńesi irikteıdi. «Kúzgi samal» – áleýmettik mańyzy bar, ıdeologııalyq turǵydan mańyzdy joba retinde tanyldy. Sondaı-aq memleket qoldaýymen shyǵatyn barlyq fılm sııaqty bul týyndy da kózi nashar kóretin jandarǵa arnalǵan tıflokommentarıılermen (kórý qabileti buzylǵan nemese múldem kórmeıtin jandarǵa arnalǵan qosymsha dybystyq jol) jabdyqtalǵan, – dep atap ótti Ádilet Omarov.
Ortalyq basshysy Qurmanbek Jumaǵalıdyń málimetinshe, sońǵy úsh jylda memleket 57 jobaǵa qoldaý kórsetken, onyń basym bóligi (43 joba) – jastardyń jumysy. Bıyl jyl sońyna deıin kórermen nazaryna taǵy 24 jańa fılm usynylmaq.
Aıta keteıik, kınosúıer qaýymǵa elimizde osy aptada shyǵatyn kıno jańalyqtardy jarııalaǵan bolatynbyz.
