Berik Asylov turmystaǵy zorlyq-zombylyq jóninde: Eshkimniń shenine qaramaıyq
Sońǵy bir toqsanda ákimshilik jaýapkershilikke tartylǵan úıbuzarlardyń sany 7 myńnan 27 myńǵa deıin artty. Bas prokýror Berik Asylov otbasylyq-turmystyq zorlyq-zombylyq profılaktıkasy men qoǵamdyq oryndarda quqyq buzýshylyqtyń aldyn alý máseleleri jónindegi úılestirý keńesiniń otyrysynda osyndaı derek keltirdi, dep habarlaıdy Kazinform.
«Polıtsııanyń úıdegi zorlyq-zombylyq týraly shaǵymdarǵa áreket etý tásili qaıta qaraldy. Sonyń nátıjesinde, úshinshi toqsanda ákimshilik jaýapkershilikke tartylǵan úıbuzarlardyń sany 7 myńnan 27 myńǵa deıin artty. Jyl basynan kisi óltirgeni jáne denege ólimmen aıaqtalǵan aýyr jaraqat salǵany úshin 80 adam uzaq merzimge bas bostandyǵynan aıyryldy», – dedi Berik Asylov.
Bas prokýror bul quqyq buzýshylyqty jazamen ǵana tyıý múmkin emes ekenin eske saldy. Onyń paıymynsha, bul iste qoǵamnyń qoldaýy mańyzdy.
«Báriniń esinde shyǵar, Іshki ister mınıstrligi qaýipsizdik beldigi men kólik terezesin tumshalaý faktileri boıynsha ymyrasyz kúres júrgizgende qoǵam qoldaǵan edi. Eshkimniń shenine qaraǵan joq, eshkimdi keshirgen joq. Sonyń áserinen jolda japa shegetinder sany azaıǵan bolatyn.
Búkil salada osyndaı ustanym bolýy kerek. Ásirese áıelder men balalardyń amandyǵy týraly aıtyp otyrsaq, munyń mańyzy zor. Bul jerde adamdardyń quqyqtyq sanasy ózgerýi kerek. Áli kúnge deıin japa shegýshilerdiń kóbi polıtsııaǵa júginbeıdi. Tipti keıde týystary aýzyn jabady. Kórshiler de ondaı daý-janjaldan aýlaq bolýǵa tyrysady. Sonyń saldarynan ózin jazasyz sezingenderdiń uryp-soǵý men qorlaý áreketeri bala men áıel ólimine de ákep soǵýda. Bizdiń búgingi mindetimiz osynyń bárine naqty sheshim qabyldaý. Kóptegen áıel men balanyń taǵdyry bizdiń naqty qadamdarymyz ben sheshimderimizge baılanysty», - dedi ol.
