Berik Asylov prokýrorlyq qadaǵalaýdyń nátıjelerin jarııalady
ASTANA. KAZINFORM – 2025 jyldyń qorytyndysy boıynsha qadaǵalaý organy memleket múddesin 1,1 trıllıon teńgeden astam somaǵa qorǵaǵan. Bul týraly Bas prokýror Berik Asylov H jelisindegi jazbasynda málimdedi.
Onyń sózinshe, memlekettik satyp alý, qorshaǵan ortany qorǵaý jáne jer qoınaýyn paıdalaný salalaryndaǵy zańsyz áreketterden 470 mıllıard teńge kólemindegi qarjy men múlik tárkilengen.
– Bas prokýratýra qarjy jáne ádilet mınıstrlikterimen birlesip memlekettik múlikti basqarýdyń zańdylyǵyna júrgizilgen bir ǵana tekserýdiń nátıjesinde 3 jyldan astam ýaqyt boıy shottarda buǵattalyp turǵan jáne bıýdjetke tólenbegen 193 mlrd dıvıdendterdi tóleý boıynsha sharalar qabyldandy. Memleket menshigine Alataýdyń taý eteginde, Kaspıı teńiziniń jaǵalaýynda, Býrabaı ulttyq parkinde ornalasqan olıgopolııalardyń jeri, sondaı-aq jyldar boıy maqsatty túrde paıdalanylmaǵan qoǵamdyq jaıylymdar men ózge de alqaptar – aýyl sharýashylyǵy maqsatyndaǵy jerdiń barlyǵy 800 myń gektar qaıtaryldy. Nátıjesinde birqatar óńirde jaıylym tapshylyǵy máselesi is júzinde sheshildi – prokýrorlar aýyldyq aýmaqtardyń barlyq turǵyndaryna olardy paıdalaný múmkindigi men qoljetimdiligin qamtamasyz etti.
Prezıdent bekitken ishki saıasat qaǵıdattary men «Taza Qazaqstan» tujyrymdamasy aıasynda tabıǵat paıdalanýshylarmen keltirilgen 25 mlrd kólemindegi ekologııalyq zalal óteldi. Tsıfrlyq tehnologııalardy, ǵaryshtyq monıtorıngti jáne jasandy ıntellekt elementterin paıdalana otyryp, prokýrorlar ekologtarmen birlesip 3,8 myńnan astam zańsyz qoqys oryndaryn joıdy. Prokýrorlyq qadaǵalaý aktileri boıynsha qurylys salýshylarmen 300 myńnan astam jańa jasyl jelekter otyrǵyzyldy.
Memlekettik basqarýdyń tıimdiligin arttyrý týraly Prezıdenttiń Jarlyǵyn oryndaý sheńberinde prokýrorlar jergilikti atqarýshy organdardyń shyǵystaryn ońtaılandyryp, 255 mlrd teńge kólemindegi qajetsiz memlekettik shyǵyndardyń jolyn kesti. Muny – tutas bir óńirdiń jyldyq bıýdjetimen salystyrýǵa bolady.
Pavlodar men Atyraýda jergilikti organdar arnaıy tehnıka men páterlerdi naryqtyq baǵasynan úsh ese qymbat baǵamen satyp alýdy josparlaǵan. Prokýrorlar bul satyp alýlardy toqtatyp, qarajat ózge áleýmettik qajettilikterge jáne ınfraqurylymdy jaqsartýǵa baǵyttaldy, - dedi Berik Asylov.
Ol sondaı-aq prokýrorlardyń ótinishhattary men narazylyqtary boıynsha 300-den astam azamattyq jáne ákimshilik is boıynsha sheshimder qaıta qaralǵanyn, onyń ishinde memleket paıdasyna 22 mlrd teńge óndirilgenin jetkizdi.
– Mysaly, meniń narazylyǵym boıynsha memleketten eki jeke kompanııanyń kredıttik bereshegi úshin 1,2 mlrd teńge óndirip alý joıyldy. Kerisinshe, meniń narazylyǵym boıynsha oryndalmaǵan qarý-jaraqty jóndeý jumystary úshin memlekettik qorǵanys tapsyrysynyń paıdasyna 800 mln teńge óndirildi.
Qoǵam men memlekettiń ekonomıkalyq múddelerin qorǵaý salasyndaǵy prokýrorlyq qadaǵalaýdyń tıimdiligi, sonyń ishinde tsıfrlyq tehnologııalar men jasandy ıntellekt elementterin jumysqa engizý esebinen artyp keledi, - dedi ol.
Eske salsaq, osyǵan deıin Kaspıı qubyr jelisine jasalǵan shabýylǵa qatysty jaǵymsyz pikir aıtqandardy tergep-tekserý júrip jatqanyn jazǵanbyz. Bul týraly Májilis depýtattarynyń saýalyna Bas prokýror Berik Asylovtyń jaýabynda aıtylǵan.