Berik Asylov: Qylmystyq isterdiń 94 paıyzy elektrondy formatta tergeledi
ASTANA. KAZINFORM — Qazaqstan Respýblıkasynyń Bas Prokýrory Berik Asylov jasandy ıntellekt salasyndaǵy álemge tanymal sarapshy, 01.AI kompanııasynyń bas atqarýshy dırektory, Qazaqstan Respýblıkasy Prezıdentiniń keńesshisi, doktor Kaı-Fý Lıdi qabyldady.
Kezdesý Qazaqstan Respýblıkasynyń Prezıdenti Qasym-Jomart Toqaev jarııalaǵan Tsıfrlandyrý jáne jasandy ıntellekt jyly aıasynda ótti.
2026 jyly Qazaqstanda alǵash ret Tsıfrlyq kodeks pen «Jasandy ıntellekt týraly» Zań qabyldandy. Bolashaqtyń tsıfrlyq qalasy — Alataý salynýda. Memleket basshysy eldi árbir sheshim ashyq, árbir áreket esep berýge mindetti, al árbir azamat zań men tehnologııalardyń kúshimen qorǵalatyn memlekettik basqarý modeline kezeń-kezeńimen bastap keledi.
Memlekettik organdar el basshylyǵynyń baǵytyn júıeli túrde júzege asyryp jatyr. Bul baǵyttan prokýratýra organdary da tys qalǵan joq.
Kezdesý barysynda Berik Asylov qadaǵalaý organynda jınaqtalǵan aýqymdy derekter qory tsıfrlyq esepke alýdan jasandy ıntellekt pen Alem.Cloud sýperkompıýteriniń múmkindikterin paıdalana otyryp, zııatkerlik taldaý men táýekelderdi boljaý deńgeıine kóshýge múmkindik bergenin atap ótti.
Qonaqqa prokýratýra organdaryndaǵy tsıfrlyq transformatsııanyń aýqymy jáne tsıfrlyq esepke alýdan boljam jasaýǵa, analıtıka men táýekelderdiń aldyn alýǵa kóshýge múmkindik bergen negizgi jetistikter tanystyryldy.
— Búginde qylmystyq isterdiń 94%-y aryz tirkelgen sátten bastap úkimniń oryndalýyna deıin elektrondyq formatta tergeledi. Bul — qaǵaz qylmystyq ister dáýiriniń aıaqtalǵanyn bildiredi, — dedi qadaǵalaý vedomstvosynyń basshysy.
Ákimshilik is júrgizý, bıznesti qorǵaý, azamattardyń ótinishterin qaraý jáne ózge de baǵyttar tolyq tsıfrlandyrylǵan.
Qazirgi tańda 300-den astam memlekettik organnyń derekqorlarymen ıntegratsııalanǵan 7 vedomstvoaralyq aqparattyq júıe tabysty jumys istep jatyr.
«Qazaqtelekommen» birlesip elimiz boıynsha alaıaqtardyń qońyraýlaryn buǵattaıtyn Antıkoll-ortalyq quryldy. Onyń bir jyldyq jumysy barysynda 1 mıllıonnan astam alaıaqtyq qońyraý toqtatyldy.
Prokýrorlar «Tsıfrlyq qadaǵalaý» júıesi arqyly qoǵamdyq oryndardaǵy ıntellektýaldy beınekameralarǵa qosylǵan. Jasandy ıntellekt negizindegi bul júıe quqyq buzýshylardyń tsıfrlyq izderin anyqtaıdy.
Quqyqtyq statıstıka jáne arnaıy esepke alý komıtetinde qylmystyq qaýip-qaterlerdi boljaý ortalyǵy qurylyp, krımınogendik táýekelderdi anyqtaý baǵytynda jumys júrgizýde.
Osy jáne basqa da qabyldanǵan sharalar qylmys deńgeıiniń tómendeýine oń áserin tıgizýde.
Doktor Kaı-Fý Lı Bas prokýratýranyń jasandy ıntellektti engizý tájirıbesine joǵary baǵa berip, memlekettik basqarý júıesine jasandy ıntellektti búginnen bastap engizip jatqan memleketter uzaq merzimdi tehnologııalyq artyqshylyqqa ıe bolatynyn atap ótti.
Sonymen qatar ol Qazaqstannyń jasandy ıntellektti damytýdaǵy bolashaq óńirlik ortalyqtardyń birine aınalý áleýeti jónindegi kózqarasymen bólisip, zamanaýı tsıfrlyq ınfraqurylym qalyptastyrý jáne zııatkerlik tehnologııalardy damytý baǵytyndaǵy elimizdiń básekelestik artyqshylyqtaryn erekshe atap ótti.
Bas Prokýror Kaı-Fý Lıdiń AI 2.0, mýltıagenttik júıeler, basshylardyń jumys tıimdiligin arttyrýǵa arnalǵan «Boss AI» tujyrymdamasy jáne bilim berý salasyndaǵy túbegeıli ózgeristerdiń qajettiligi týraly ıdeıalaryna joǵary baǵa berdi.
— Bul tásilder Memleket basshysynyń Qazaqstandy ıntellekt eksporttaıtyn elge aınaldyrý jónindegi paıymymen tolyq úndesedi, — dep atap ótti Berik Asylov.
Kezdesý qorytyndysy boıynsha taraptar prokýratýra organdarynyń qyzmetine jáne memlekettik basqarý júıesine jasandy ıntellekt tehnologııalaryn engizý salasynda tájirıbe almasýdy jalǵastyrýdyń ári yntymaqtastyqty damytýdyń mańyzdylyǵyn atap ótti.
