Berik Asylov: Investorlardyń quqyqtaryn qorǵaýdyń biryńǵaı standarty engiziledi
ASTANA. KAZINFORM — Búgin Bas Prokýror Berik Asylovtyń buıryǵymen qurylǵan Investorlardyń quqyqtaryn qorǵaý jónindegi sarapshylyq keńestiń alǵashqy otyrysy ótti.
Atalǵan is-shara memlekettik organdardy, otandyq jáne sheteldik iri bıznesti, elimizdiń jetekshi zańgerleri men ekonomısterin biriktirgen turaqty jumys isteıtin bedeldi dıalog alańynyń iske qosylǵanyn bildiredi.
Keńes jumysyna Bas prokýrordyń birinshi orynbasary Jandos Ómirálıev, Investorlardyń quqyqtaryn qorǵaý komıtetiniń tóraǵasy Baýyrjan Eraly, memlekettik organdardyń, «Astana» halyqaralyq qarjy ortalyǵynyń, «Atameken» ulttyq kásipkerler palatasynyń, «Báıterek» ulttyq ınvestıtsııalyq holdıngi» AQ-nyń, bıznes pen sarapshylar qaýymdastyǵynyń ókilderi qatysty.
Otyrysty ashqan Berik Asylov qatysýshylardy Qazaqstan Respýblıkasynyń jańa Konstıtýtsııasynyń kúshine enýimen quttyqtap, onda aıqyndalǵan «Ádiletti Qazaqstan» jáne «Zań men Tártip» qaǵıdattarynyń búkil memlekettik júıeniń basty baǵdaryna aınalǵanyn atap ótti.
Memleket basshysy Qasym-Jomart Toqaevtyń tapsyrmalaryn (2025 jylǵy 17 jeltoqsandaǵy Jarlyq) iske asyrý aıasynda Investıtsııalyq ombýdsmennińókilettikteri berilgen Bas Prokýror qatysýshylarǵa bıznesti qorǵaýdyń keshendi júıesin tanystyrdy.
Munda prokýrorlar ınvestorlar zańmen jáne memleketpen ózara is-qımyl jasaıtyn barlyq kezeńde qadaǵalaýdy qamtamasyz etedi.
— Búginde memleketter arasyndaǵy básekelestik resýrstar úshin emes, senim úshin júrip jatyr. Biz zańdy Qazaqstannyń básekelestik artyqshylyǵyna aınaldyrýǵa mindettimiz. Ol úshin ústirt ózgerister emes, memleket pen bıznes arasyndaǵy ózara qarym-qatynasty júıeli túrde jetildirý qajet, — dedi Berik Asylov.
Qazirgi ýaqytta prokýratýranyń súıemeldeýimen jalpy ınvestıtsııa kólemi 112 trıllıon teńge bolatyn 3,3 myń ınvestıtsııalyq joba júzege asyrylyp jatyr.
Búgingi kúni úsh myńnan astam ınvestordyń quqyqtary qorǵalyp, 30 myń jańa jumys ornyn qurýdy kózdeıtin 270-ten astam ınvestıtsııalyq jobanyń iske asyrylýy qamtamasyz etildi.
Sonymen qatar ákimshilik qysymdy júıeli túrde tómendetý jumysy istelip jatyr.
Kásipkerler men memlekettik organdar arasyndaǵy sot daýlarynyń sany shamamen 40%-ǵa qysqardy, bıznesti ákimshilik jaýaptylyqqa tartý jaǵdaılary 16%-ǵa azaıdy, sondaı-aq kásipkerlerdi qylmystyq qýdalaýdy tómendetý úrdisi saqtalyp otyr. Tek jyl basynan beri prokýratýra ınvestorlardyń quqyqtaryn buzýy múmkin memlekettik organdardyń 800-den astam sheshimin kelisýden bas tartty.
Bas Prokýror bıznesti qorǵaýdyń memlekettik kepildikterin edáýir kúsheıtken zańnamalyq ózgeristerge erekshe toqtaldy.
Endi ınvestorlardyń quqyqtaryn qorǵaý máseleleri boıynsha prokýrorlyq qadaǵalaý aktileri, onyń ishinde nusqama nysanyndaǵy aktiler memlekettik jáne kvazımemlekettik uıymdar úshin mindetti. Budan bólek, Bas Prokýrorǵa elimizdiń barlyq óńirinde ınvestıtsııalyq jobalardy prokýrorlyq súıemeldeýdiń biryńǵaı tártibin aıqyndaý ókilettigi berildi.
Bul «óńirlik árkelikti» boldyrmaı, Qazaqstannyń kez kelgen óńirinde ınvestorlardyń quqyqtaryn qorǵaýdyń biryńǵaı ári qatań standarttaryn qamtamasyz etedi.
Keńes otyrysynda ákimshilik kedergilerdińdástúrli túrde bastamashyldyqty tejeıtin qurylys salasyn odan ári jetildirýge baǵyttalǵan sheshimder ázirlendi.
Bas Prokýror sarapshylardyń shamadan tys júktemesine baılanysty máselelerge toqtaldy. Sonyń saldarynan olar myńdaǵan betten turatyn syzbalar men smetalardy aılar boıy qolmen zerdeleýge májbúr bolyp, osy ýaqytta bıznes jumysy turalap qalady. Jasandy ıntellekt olardyń zańnama men memlekettik standarttardyń talaptaryna sáıkestigin jedel taldaýdy qamtamasyz etýi tıis.
Bul bastamalar Memleket basshysynyń tsıfrlandyrý men jasandy ıntellektti damytý jónindegi strategııalyq tapsyrmalarymen tolyq úndesedi.
Jobalarǵa saraptama júrgizý kezinde «eskertýlerdiń tolyq tizbesin» engizý jáne merzimderin qysqartý jónindegi sharalar qoldaý tapty.
— Usynylyp otyrǵan sharalar qurylys salasyn «qaǵazbastylyqtan» aryltyp, ashyq júıege aınaldyrýǵa tıis, — dedi Bas Prokýror.
Kún tártibindegi ekinshi másele ınvestıtsııalar salasyndaǵy memlekettik organdar qyzmetiniń tıimdiligin baǵalaý (KPI) júıesin qaıta qaraý qajet boldy.
Qatysýshylar formaldy kórsetkishterden naqty ekonomıkalyq nátıjelerge — jańa óndirister men jumys oryndaryn qurýǵa, eksportty damytýǵa, ımportty almastyrýǵa jáne ınvestıtsııalyq jobalardy tabysty iske asyrýǵa negizdelgen baǵalaý júıesine kóshýdi qoldady.
Otyrysty qorytyndylaǵan Berik Asylov Sarapshylyq keńes keste boıynsha ǵana jınalatyn formaldy organ bolmaıtynyn atap ótti. Onyń aıtýynsha, Keńes bıznestiń suranysy boıynsha jedel jınalyp, salaaralyq júıeli kedergilerdi tıimdi sheshýge qabiletti serpindi ınstıtýtqa aınalady.
Aıta ketelik Jaslan Mádıev sheteldik ınvestorlarǵa Qazaqstannyń tsıfrlyq bastamalaryn tanystyrǵan edi.
