Berik Ábdiǵalıuly Ulytaý oblysynyń ákimi laýazymynda nesimen este qaldy

Elimizde úsh jańa aımaq qurylǵaly eki jyldan astam ýaqyt ótti. Olardyń arasynda Ulytaý oblysy da bar. Óńirde úsh qala men eki aýdan bar, jalpy 227 myń adam turady. Aımaq basshysy bolyp turǵan tusynda Berik Ábdiǵalıuly ne isteı aldy, nesimen este qaldy? Bul týraly Kazinform agenttigi tilshisiniń materıalynan oqı alasyz.

Berik Ábdiǵalıuly 1971 jyly 18 qyrkúıekte Qaraǵandy oblysynyń Rýdnık (qazirgi Jezqazǵan) kentinde dúnıege kelgen. Bilimi boıynsha tarıh jáne qoǵamtaný pánderiniń oqytýshysy. 1994 jyly Ál-Farabı atyndaǵy Qazaq ulttyq ýnıversıtetin bitirgen.

Osydan 35 jyl buryn, 1989 jyly eńbek jolyn Qaraǵandy oblystyq balalar kitaphanasynda kitaphanashy qyzmetinen bastaǵan. Alaıda, resmı derekkózderde Berik Ábdiǵalıulynyń mansaby 1994 jyly QR Prezıdenti janyndaǵy Qazaqstandyq strategııalyq zertteýler ınstıtýtynda bastalǵany jazylǵan.

Ár jyldary Temirtaý ákimi, Jezqazǵan jáne Arqalyq qalalarynyń ákimi, Qaraǵandy oblysy ákiminiń orynbasary qyzmetterin atqardy. Sondaı-aq Qazaqstan Respýblıkasy birinshi vıtse-premeriniń keńesshisi, Mádenıet jáne aqparat mınıstriniń shtattan tys keńesshisi bolyp jumys istedi.

Jetinshi shaqyrylymdaǵy Qazaqstan Respýblıkasy Parlamenti Májilisiniń depýtaty boldy.

Ol sondaı-aq saıası qýǵyn-súrgin qurbandaryn tolyq aqtaý protsesine belsendi qatysýymen jáne Túrkistan legıonynyń múshelerin aqtaý jumystarymen tanymal.

Ǵylymı eńbekterine toqtalar bolsaq, Berik Ábdiǵalıulynyń negizgi taqyryptary - tarıhı zertteýler. Ol - qazaq jáne orys tilderinde júzden astam ǵylymı eńbektiń avtory. Olardyń ishinde «Qazaqstannyń kıeli nysandary», «Jeltoqsan. 1986» qujattar men estelikter jınaǵy, «Alash áskeri», «Qazaq mıssııasy», «Saıası sózdik» jáne t. b. bar.

Al endi onyń Ulytaý oblysynyń basshysy retinde qol jetkizgen jetistikterine keletin bolsaq, aýyz toltyryp aıtar nárse az.

Esterińizge sala keteıik, ótken jyldyń jeltoqsanynda Jibek joly telearnasyna bergen suhbatynda Berik Ábdiǵalıuly oblystaǵy óndiris kásiporyndary, ondaǵy qaýipsizdik máselesi, ózi eki ret shahtaǵa túskeni jaıly aıtqan edi. 

Oblys ákimi aımaqtyń problemalary týraly da jıi aıtqan bolatyn. Olardyń ishinde eń ózekti jáne eń aýqymdylary – sýmen, jylýmen jabdyqtaý, jol qurylysy jáne kadr tapshylyǵy. Ol Ulytaý oblysyn eldiń ekonomıkalyq jáne týrıstik ortalyǵyna aınaldyrý josparyn jarııa etken. Alaıda ol úshin qyrýar qarjydan bólek, adamı resýrstar da qajet ekeni tilge tıek etildi.

Berik Ábdiǵalıuly basshylyq etken kezeńde, shyny kerek, oblysta aýyz toltyryp aıtarlyq ózgerister bolǵan joq. Ol jaıly tipti halyq qalaýlylary da aıtyp, renish bildirgen. 

Ókinishke qaraı, osy eki jarym jylda jańa óńirde túrli problemalardyń beti ashyldy. Mysaly, ana men bala ólimi kórsetkishiniń joǵary deńgeıi.  Muny oblys ákimi perzenthana joq dep túsindirdi.

Ol azdaı, aýyl sharýashylyǵy salasyna bir mıllıardtan astam sýbsıdııa berilgenine qaramastan, óńirde jappaı mal qyrylǵan. 

Al kóktem kelisimen oblys basshylyǵy sý tasqynymen kúresýge májbúr boldy. 

Dúıim jurt kópten kútken joldary da qalpyna keltiriler emes. 

Árıne, qarjy problemalary da barshylyq. Kóktemde QR joǵary aýdıtorlyq palatasy Ulytaý oblysynda memlekettik aýdıt júrgizip, 4,1 mlrd. teńgege qarjylyq zań buzýshylyqtar anyqtaǵan.

Biraq jaqsy jańalyqtar da boldy. Máselen. bıyl 33 otbasy qonys toıyn toılady.

Búgin Berik Ábdiǵalıuly Ulytaý oblysynyń ákimi laýazymynan bosatyldy.

Onyń ornyna Memleket basshysynyń Jarlyǵymen Ulytaý oblysynyń ákimi laýazymyna Dastan Adaıuly Ryspekov taǵaıyndaldy.