Berilgen mindetterdi oryndaımyn – Jandos Búrkitbaev óziniń taǵaıyndalýy týraly

NUR-SULTAN. QazAqparat – QR Densaýlyq saqtaý mınıstri mindetin atqarýshy Jandos Búrkitbaev óziniń jańa qyzmetke taǵaıyndalýy týraly pikir bildirdi, dep habarlaıdy QazAqparat.

«Eń aldymen, memlekettik organdardyń birinshi basshylaryn taǵaıyndaý, jumystan bosatý týraly sheshimdi elimizdiń joǵary basshylyǵy qabyldaıdy. Tıisinshe, oǵan meniń pikir bildirýim orynsyz bolady. Men memlekettik saıası qyzmetker retinde ózime berilgen tapsyrmalardy oryndaımyn, qoldaǵy ókilettikter aıasynda berilgen mindetterdi atqaramyn», - dedi J. Búrkitbaev Úkimet otyrysynan keıin tilshilerge bergen suhbatynda.

Onyń aıtýynsha, Densaýlyq saqtaý mınıstrliginiń jumysy josparly, júıeli túrde júrip jatyr. Júıeli máseleler josparlar aıasynda esh dúrligýsiz sheshilýde.

«Memlekettik qyzmette jumys isteý qashanda jaýapty is, bul eń aldymen óz aldyńdaǵy, áriptesterdiń jáne Qazaqstan halqynyń aldyndaǵy úlken jaýapkershilik. Densaýlyq saqtaý mınıstrliginiń negizgi róli – Qazaqstan azamattarynyń densaýlyǵyn qorǵaý. Men munda taǵaıyndaý kórip turǵan joqpyn, mindetterdi atqarýym kerek», - dedi Jandos Búrkitbaev.