Berik Ýálıdiń densaýlyǵy jaqsaryp, aýrýhanadan shyqty
NUR-SULTAN. QazAqparat - Koronavırýs juqtyryp alǵan QR Prezıdentiniń baspasóz hatshysy Berik Ýálıdiń densaýlyǵy jaqsaryp, aýrýhanadan shyqty, dep habarlaıdy QazAqparat tilshisi.
«Iá, búgin aýrýhanadan shyqtym. Medıtsınalyq qorytyndyda densaýlyǵymnyń jaqsarǵany jazylǵan. Dárigerler koronavırýs ınfektsııasynyń aýyr túri degen dıagnoz qoıǵan edi. Ekijaqty polısegmenttik pnevmanııamen 5 kún boıy reanımatsııa bólimshesinde jattym. Qazir úıge shyqqanymmen qatań karantındik baqylaýda bolamyn. Dárigerler de densaýlyǵymdy jiti qadaǵalap otyrady. Otbasymmen de baılanysty barynsha azaıtýǵa týra keledi», - dedi Berik Ýálı.
QR Prezıdentiniń baspasóz hatshysy aldaǵy ýaqytta da qashyqtan jumys isteı beretindigin aıta kele, koronavırýs indetimen kúresip júrgen, onyń ishinde ózin emdegen dárigerlerge, jalpy medıtsına qyzmetkerlerine shynaıy rızashylyǵyn bildirip ótti.
«Ózderińiz de bilesizder, keshe ǵana Medıtsına qyzmetkerleri kúnin atap óttik. Osy oraıda olardyń naǵyz batyr ekendigin atap ótsem deımin. Olardyń kópshiligi birneshe aı boıy otbasyn da kórgen joq. Kúni-túni koronavırýs ınfektsııasymen kúresip jatyr. Sondyqtan olarǵa shynaıy rızashylyǵymdy bildiremin», - dedi Berik Ýálı.
Esterińizge sala keteıik, QR Prezıdentiniń baspasóz hatshysy Berik Ýálı 6 maýsymda koronavırýs juqtyryp alǵandyǵyn áleýmettik jelide jazǵan edi.
