Berık Ýálı: Prezıdent kelisý protsedýralaryna qaramastan sheshim qabyldaýǵa quqyly
NUR-SULTAN. QazAqparat – Memleket basshysynyń baspasóz hatshysy Berik Ýálı QR Prezıdentiniń 9 qazandaǵy Jarlyǵyn tilshilerge túsindirgen Ádilet mınıstriniń sózine qatysty pikir bildirdi, dep habarlaıdy QazAqparat tilshisi.
«Ádilet mınıstriniń pikirin qıynsyz dep sanaımyn. Múmkin jýrnalısterdiń tónip kelýinen Marat Beketaev shatasyp, durys tujyrymdama bermegen bolýy kerek. Bir qyzyǵy, mundaı deńgeıdegi laýazymdy tulǵa óziniń fýnktsıonaldyq mindetteri sheńberindegi kez kelgen máseleni árdaıym durystap túsindirip berýge qabiletti bolýy kerek», - dedi Berik Ýálı qazaqstandyq BAQ kózderine bergen túsiniktemesinde.
Baspasóz hatshynyń túsindirýinshe, Konstıtýtsııa – Prezıdenttiń mindetteri men quzyreti naqty jazylǵan negizgi zań.
«Ártúrli pikirge sebep bolǵan osy jyldyń 9 qazanyndaǵy Jarlyqta bir tarmaq bar. Oǵan sáıkes, Prezıdent saıası memlekettik qyzmetshiler men ózge de laýazymdy tulǵalardy taǵaıyndaýdy jáne qyzmetinen bosatýdy kelisý tártibi týraly tarmaqta kórsetilgen protsedýralarǵa qaramastan, sheshim qabyldaýǵa quqyly», - dedi Berik Ýálı.
Osylaısha, memlekettiń basty laýazymdy tulǵasy, Konstıtýtsııanyń garanty, Joǵarǵy Bas Qolbasshy retinde eldiń negizgi zańyna súıene otyryp, Prezıdentke esep berýge mindetti Úkimet múshelerin, kúshtik qurylymdar men ózge de vedomstvolardyń, sonymen birge aımaq basshylaryn taǵaıyndaýǵa qatysty sheshimderdi qabyldaıdy.
Berik Ýálıdiń aıtýynsha, atalǵan Jarlyqtyń protsedýralyq sıpaty bar. Ol Memleket basshysynyń óziniń konstıtýtsııalyq mindetterin oryndaýǵa eshqandaı áser ete almaıdy.
Eske sala ketsek, buǵan deıin Ádilet mınıstri Marat Beketaev QR Prezıdentiniń 2019 jyldyń 9 qazanyndaǵy Jarlyǵyna qatysty pikir bildirgen bolatyn.
