Berik Ýálı QR Prezıdenti Ákimshiligindegi qyzmetkerler sanyna qatysty túsinikteme berdi
NUR-SULTAN. QazAqparat – Qazaqstan Respýblıkasy Prezıdenti Ákimshiliginiń baspasóz hatshysy Berik Ýálı Ákimshilikte isteıtin qyzmetkerler sanyna qatysty túsinikteme berdi, dep habarlaıdy QazAqparat.
Bul týraly Berik Ýálı óziniń Facebook -paraqshasynda jazdy.
«Qazaqstan Respýblıkasy Prezıdent Ákimshiligi qyzmetkerleriniń sany jaıynda
áleýmettik jelilerde Memleket basshysy apparaty qyzmetkerleriniń sany 3 myń adam degen jalǵan (feık) aqparat tarap jatyr. Shyndyǵynda Prezıdent Ákimshiliginde 408 adam jumys isteıdi. Onyń ishinde Qaýipsizdik keńesiniń 50 qyzmetkeri de bar. Buqaralyq aqparat quraldary ókilderi men áleýmettik jeli qoldanýshylaryn naqty derekke súıenýge jáne shyndyqqa janaspaıtyn aqparatty taratpaýǵa shaqyramyz»,-dep jazdy baspasóz hatshysy.
Sondaı-aq ol jalǵan aqparatty qasaqana taratqandardyń jaýapqa tartylatynyn eskertti.
