Berik Kamalıev «Fokker-100» ushaǵynyń apatqa ushyraý sebebi jarııalanatyn merzimdi atady

NUR-SULTAN. QazAqparat – 2020 jyldyń 10 qańtaryna deıin «Fokker-100» ushaǵynyń apatqa ushyraý sebebi jarııa etiledi. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Indýstrııa jáne ınfraqurylymdyq damý vıtse-mınıstri Berik Kamalıev aıtty, dep habarlaıdy QazAqparat tilshisi.

«El Prezıdenti Qasym-Jomart Toqaevtyń tapsyrmasyna sáıkes, 10 qańtarǵa deıingi merzimde úkimettik komıssııa áýe apatynyń aldyn ala sebepterin jarııa etetin bolady. Sonymen qatar osyǵan deıin aıtyp ótkenimdeı, búgin Memleketaralyq avıatsııa komıtetiniń sarapshysy keledi. Ekıpajǵa qatysty aıtar bolsam, ushýlar týraly erejege sáıkes, áýe kemesi ushý aldynda olar medıtsınalyq tekserýden ótedi. Olar medıtsınalyq tekserýden Almaty qalasy áýejaıynyń medıtsınalyq pýnktinen ótken», -dedi vıtse-mınıstr.

Onyń dereginshe, «Fokker-100» ushaǵy 1996 jyldyń 8 aqpanynda shyǵarylǵan. 2020 jyldyń 21 mamyryna deıin ushýǵa sertıfıkaty bar. Almaty qalasyndaǵy «Bek Eır» kompanııasynyń avıatsııalyq-tehnıkalyq ortalyǵynan tekserýden ótken. 44 362 saǵat áýede ushqan.

«Ushaq tekserýden ótkennen keıin 361 saǵat ushqan. Apatqa ushyraǵan «Fokker-100» ushaǵy sońǵy reısin 25 jeltoqsan kúni Atyraý-Almaty baǵytynda oryndaǵan», - dedi Berik Kamalıev.