Berik Imashev jańa saılanǵan senatorlarǵa depýtattyq kýálikterdi tabys etti
ASTANA. QazAqparat - Búgin QR Ortalyq saılaý komıssısy 28 maýsymda saılanǵan QR Parlamenti Senatynyń depýtattaryn tirkedi, dep habarlaıdy QazAqparat.
QR OSK tóraǵasy Berik Imashevtiń tóraǵalyǵymen ótken otyrysqa Senattyń eń alǵashqy tóraǵasy Ómirbek Baıgeldi, jańadan saılanǵan senatorlar, oblystyq, Astana jáne Almaty qalalyq saılaý komıssııalarynyń hatshylary, máslıhat hatshylary qatysty.
«2017 jyldyń 27 maýsymynda el Konstıtýtsııasy men Saılaý týraly konstıtýtsııalyq zańyna sáıkes, QR Parlamenti Senatynyń 16 depýtaty saılandy. Aımaqtyq saılaý komıssııalary Ortalyq saılaý komıssııasy bekitken barlyq qajetti sharalardy kúntizbelik josparǵa jáne qoldanystaǵy zańnamaǵa sáıkes ótkizdi. Jalpy saılaý naýqanynda 89 kandıdat usynylyp, onyń 38-iniń aty jóni saılaý bıýlletenine engizildi. Respýblıka boıynsha saılaýshylardyń kelýi 98,5 protsentti qurady. Aıta keterligi, alǵash ret saılaýda saılaýshylardy elektrondy tirkeý júrgizildi», - dedi otyrysty ashqan Berik Imashev.
Onyń aıtýynsha, jańadan saılanǵan senatorlardyń óńirlik deńgeıde basshylyq laýazymda mol tájirıbeleri bar, aımaqtardyń áleýmettik-ekonomıkalyq jaǵdaıymen jete tanys.
Otyrys barysynda Ortalyq saılaý komıssııasynyń «2017 jylǵy 28 maýsymda QR Parlamenti Senatyna saılanǵan depýtattardy tirkeý týraly» qaýly qabyldady. Osy qaýlyǵa sáıkes QR Ortalyq saılaý komıssııasynyń tóraǵasy jańadan saılanǵan senatorlar Ádilbekov Dáýren Zekenulyna, Jumaǵazıev Muhtar Sabyrulyna, Qylyshbaev Nurlan Naýryzulyna, Dúısembaev Ǵumar Islıamulyna, Tóreǵalıev Narımanǵa, Nurálıev Ábdáli Toqbergenulyna, Ábdikerov Rysqalıǵa, Nurǵalıev Jeńis Mırasulyna, Baqtııaruly Muratqa, Shelpekov Baqtybaı Aqberdiulyna, Qurtaev Álimjan Seıitjanulyna, Nursıpatov Nurjan Nurlanbekulyna, Sultanov Erik Hamzaulyna, Mýsın Dúısenǵazy Maǵaýııaulyna, Mamytbekov Edil Qulamqadyrulyna jáne Núketaeva Dınar Júsipáliqyzyna depýtattyq kýálik pen belgilerdi tabys etti.
Otyrys sońynda Berik Imashev BAQ ókilderin kásibı merekelerimen quttyqtap, alǵys hattar tabys etti.
