Berik Imashev TMD baıqaýshylarymen kezdesti

NUR-SULTAN. QazAqparat - Búgin QR Ortalyq saılaý komıssııasynyń tóraǵasy Berik Imashev Táýelsiz Memleketter Dostastyǵynyń baıqaýshylar mıssııasynyń basshysy Sergeı Lebedev bastaǵan delegatsııamen kezdesti, dep habarlaıdy QazAqparat tilshisi.

Kezdesý barysynda Berik Imashev TMD delegatsııasyn 2019 jyldyń 9 maýsymyna taǵaıyndalǵan kezekten tys Prezıdenttik saılaýǵa daıyndyq protsesimen tanystyrdy.

Óz kezeginde Sergeı Lebedev TMD-nyń saılaýdy baıqaýǵa qatysyp otyrǵan bul mıssııasy dostastyq aıasyndaǵy eń iri mıssııa ekendigin aıtty. TMD elderiniń baıqaýshylar mıssııasy Qazaqstandaǵy óz jumysyna 2019 jyldyń 20 mamyrynan bastap kirisken. Sol ýaqyttan beri 20 uzaqmerzimdi baıqaýshy jumys jasap, mıssııanyń shtaby qurylǵan. Uzaqmerzimdi baıqaýshylar elimizdiń birqatar oblysynda bolyp, barlyq oblysta baıqaýshylar beketin uıymdastyrǵan.

Sonymen qatar mıssııa jetekshisi Qazaqstandaǵy oń ózgeristerge toqtalyp, saılaý ýchaskelerinde múgedekterge arnalǵan jeke kabınalardyń ashylyp, pandýstarmen jabdyqtalǵanyn atap ótti. Saılaý protsesine barlyq qatysýshynyń kásibı deńgeıi aıtarlyqtaı óskendigine nazar aýdartty.