Berik Imashev máslıhat depýtattary saılaýynyń qorytyndysyna pikir bildirdi

NUR-SULTAN. QazAqparat - QR Ortalyq saılaý komıssııasynda Qazaqstan Respýblıkasy máslıhattary depýtattarynyń kezekti saılaýynyń qorytyndylary jáne daýys berý qorytyndylary boıynsha arnalǵan otyrys ótti, dep habarlaıdy QazAqparat tilshisi.

Otyrysqa saıası partııalardyń ókilderi, onlaın rejıminde oblystardyń, Nur-Cultan, Almaty jáne Shymkent qalalarynyń aýmaqtyq saılaý komıssııalary qatysty.

Ortalyq saılaý komıssııasynyń tóraǵasy Berik Imashev otyrysty asha otyryp, máslıhattar depýtattaryn saılaý qorytyndylaryn anyqtaý jónindegi ókilettikter aýmaqtyq saılaý komıssııalaryna tıesili ekenin atap ótti. Tıisti jumystardy oblystardyń, Nur-Sultan, Almaty, Shymkent qalalarynyń aýmaqtyq saılaý komıssııalary barlyq 216 máslıhat boıynsha júrgizdi.

Osyǵan baılanysty otyrysta Qazaqstan Respýblıkasy máslıhattary depýtattarynyń kezekti saılaýynyń qorytyndylary jáne daýys berý qorytyndylary boıynsha máslıhattardyń depýtattyq mandattaryn bólý týraly aýmaqtyq saılaý komıssııalarynyń esepteri tyńdaldy.

«Saılaý naýqanynda atqarylǵan jumystar úshin barshańyzǵa alǵys aıtamyn. Osy arqyly máslıhat boıynsha saılaý naýqanyn aıaqtadyq. Máslıhat depýtattary alǵash ret proportsıonaldy saılaý júıesi boıynsha saılandy. Bul 2007 jylǵy konstıtýtsııalyq reformanyń qısyndy jalǵasy bolyp sanalady, respýblıkalyq jáne jergilikti deńgeılerde ókildi organdardy qalyptastyrý jónindegi tásilderdi birizdendiredi», - dedi Berik Imashev.

Onyń aıtýynsha, «QR Saılaý týraly» Konstıtýtsııalyq zańyna sáıkes depýtattyq mandattardy bólý kezektiligin saıası partııanyń tıisti fılıalynyń basshy organy saılaý qorytyndylary jarııalanǵan kúnnen bastap bes kúnnen keshiktirmeı aıqyndaıdy.

Máslıhattar depýtattaryn saılaý qorytyndylary týraly habardy tıisti aýmaqtyq saılaý komıssııalary jergilikti buqaralyq aqparat quraldarynda jarııalaıdy.