Berik Asylov: Qańtardaǵy tóńkeris áreketi bir jyl boıy daıyndalǵan

ASTANA. QazAqparat – Qańtar oqıǵasy kezinde memlekettik tóńkeriske oqtalý áreketi boldy. Parlament Májilisiniń jalpy otyrysynda QR Bas prokýrory Berik Asylov osyndaı paıym aıtty, dep habarlaıdy QazAqparat tilshisi.

«Sózińizdiń basynda búgin qolymyzda tolyq málimetter bar dedińiz. Qańtar oqıǵasy kezinde memlekettik tóńkeris áreketi jasaldy ma, joq pa? Eger memlekettik tóńkeris áreketi jasalǵan bolsa, ony uıymdastyrýshylar kim?», - dep surady Májilis depýtaty Saýytbek Ábdirahmanov Bas prokýrordan.

Berik Asylov qańtar oqıǵasy kezinde memlekettik tóńkeris áreketi bolǵanyn rastady.

«Memleket tóńkerisi boıynsha, bul óte kúrdeli de ońaı emes suraq. Munyń bárin tergeý kezinde ábden zerdeledik. Árıne, memleket tóńkerisin jasaýǵa oqtalý boldy. Ony tergeý tolyǵymen kórsetti. Qazirgi kezde búkil qujattardyń bárin tekserip, qarastyryp jatyrmyz. Tóńkeriske oqtalý aldyn ala daıyndalyp, josparlanǵan. Baıandamamda aıtyp ketkendeı, bir jyl buryn daıyndalý kezeńderi bolǵan.

Atap aıtqanda, bulardyń ishinde uıymdasqan qylmystyq toptardyń músheleri de bolǵan. Dinı ekstremıster de boldy, buryn sotty bolǵan adamdar da, «DVK» jaqtaýshylary da bolǵan. Olardyń áreketterinen, jańa aıtyp ótkenimdeı, 8 qalada 71 ǵımarat órtenip, buzylǵan. Ol qylmystyń bári uıymdastyrýshylardyń sebepkerligimen bolyp otyr», - dedi ol.

Sondaı-aq, Bas prokýror Másimovtiń isi sotta da qupııa tártipte qaralyp jatqanyn eske saldy.

«Al uıymdastýrshylarǵa kelsek, baıandamamda ózderińizge aıttym. Birinshiden, memleketke opasyzdyq jasaý men bılikti basyp alýǵa oqtalý boıynsha Ulttyq qaýipsizdik komıtetiniń burynǵy tóraǵasy men onyń orynbasarlaryna qatysty qylmystyq is qozǵalǵan. Ol qazirgi kezde sotqa joldandy. Іs, árıne, jabyq jáne asa qupııa tártipte sotta qaralýda.

Ekinshiden, osyǵan qosa, búgin jappaı tártipsizdiktiń 18 uıymdastyrýshysy anyqtaldy. Jańa ǵana aıtyp ótkendeı, Qyzylorda da, Almatyda da, Jambyl oblysynda da sol uıymdastyrýshylar arqyly kóptegen mekemeler buzylyp, kóptegen qylmystar jasaldy. Onyń ishinde, ásirese, Jumageldıevtiń aıryqsha róli boldy. Odan basqa dinı-ekstremıstik uıymdardyń eki múshesi Nurpeıis pen Tileýjanov Almaty áýejaıyn basyp ta alǵan. Basqa memlekettik organdardyń 71 ǵımaraty talqandaldy. Osynyń bárine nusqaý berip otyrǵan, árıne, jańaǵy basshylar dep sizderge tolyq aıta alamyn», - dedi Berik Asylov.

Foto: EPA