Berik Ábidǵalıuly 5 óńirdiń ataýyn qazaqshalaý týraly: Paıymym usynys kúıinde qaldy

ASTANA. QazAqparat – Ulytaý oblysynyń ákimi Berik Ábdiǵalıuly Ortalyq kommýnıkatsııalar qyzmetiniń kóshpeli brıfıngisinde 5 oblystyń ataýyn qazaqshalaý týraly usynysyna baılanysty pikir bildirdi, dep habarlaıdy QazAqparat tilshisi.

«Aqpan aıynyń aıaǵynda siz Qazaqstannyń 5 oblysynyń ataýyn qazaqshalaý týraly usynys aıtqan edińiz. Ol usynyńyzben áriptesterińiz (atalǵan oblystardyń ákimderi – red.) sonshalyqty kelise qoımady. Al oblystaǵy qalalardyń ataýyn ózgertý oıyńyzda joq pa?», - dep surady jýrnalıst Ortalyq kommýnıkatsııalardyń kóshpeli brıfıngisinde.

Oblys ákiminiń aıtýynsha, bul usynysty ol «Qazaq tili» respýblıkalyq qoǵamynyń tóraǵasy retinde kótergen.

«Meniń «Qazaq tili» respýblıkalyq qoǵamynyń tóraǵasy ekenimdi bilesizder. Ǵylymı konferentsııalardyń birinde ózimniń paıymymdy aıtqan edim. Men ol paıymymdy ózimniń qoǵamdyq jobalarym aıasynda buryn da aıtqanmyn. Bul – meniń paıymym. Ol usynystar sol kúıi usynys qalpynda qaldy», - dedi Berik Ábdiǵalıuly.