Berik Ábdiǵalıuly óńirde ana men bala óliminiń artýyn túsindirdi

ASTANA. QazAqparat – Ulytaý oblysynyń ákimi Berik Ábdiǵalıuly Ortalyq kommýnıkatsııalar qyzmetiniń kóshpeli brıfıngisinde óńirde ana men bala ólimi nelikten artqanyn túsindirdi, dep habarlaıdy QazAqparat tilshisi.

«Bizdiń oblysta búginge deıin perınataldy ortalyq pen oblystyq aýrýhana joq. Osynyń saldarynan keri statıstıkalyq kórsetkishter tirkelip otyr. Ókinishke qaraı ana óliminiń bir jaǵdaıy tirkelip, náreste ólimi artyp ketti. Bul respýblıkalyq kórsetkishten joǵary.

Qazir Úkimettiń qoldaýymen arnaıy perınataldy ortalyq ashý týraly sheshim qabyldandy. Tıisti jobalyq qujattary daıyndalyp jatyr. Onkologııalyq naýqastardyń sany da, ókinishke qaraı, 2,6 ese artty. Bul respýblıkalyq kórsetkishten 2 ese kóp.

Bizde onkologııalyq dıspanser de joq. Sondyqtan qazir kópsalaly aýrýhana bazasynda arnaıy onkologııalyq dıspanser ǵımaratynyń jóndeý jumystary júrip jatyr», - dedi ol.

Sondaı-aq ákim aýyldardyń densaýlyq saqtaý júıesine de kóńil bólinip jatqanyn atady.

«Óńirde 9 feldsherlik-akýsherlik bekettiń qurylysy aıaqtaldy. Taǵy toǵyzy bıyl bastalady. Jalpy 9 aýyldy densaýlyq saqtaý nysanymen qamtamasyz etemiz. Al Ulytaý aýdanynda halyq kópten beri surap júrgen aýdandyq aýrýhana salyna bastaıdy», - dedi oblys basshysy.