Berik Ábdiǵalıuly: Bereldegi jádiger «Altyn adam» ba, joq pa restavratsııadan soń belgili bolady
«Eń bastysy, ol jádigerge rekonstrýktsııa jasaý kerek. Berel qorǵanynan tabylǵan jádigerdi saqtalǵan fragmentteri arqyly tolyq qalpyna keltirse ǵana, ol «Altyn adam» ba, joq pa belgili bolady», - deıdi ortalyqtyń basshysy.
Berik Ábdiǵalıulynyń aıtýynsha, Berelden tabylǵan jádigerdi buǵan deıin tabylǵan aýqymdy tarıhı muralarmen salystyrýǵa kelmeıdi. Qorǵandaǵy tarıhı jádiger tabylǵan ornynda tolyq zerttelip bolǵannan keıin restavratorlar bas kıimniń fragmentteri arqyly onyń úlgisin tolyq keltire alady. Sondyqtan, bul jumystardy aıaqtaldy deýge áli erte.
«Qazba jumystary áli aıaqtalǵan joq. Áli de kúrdeli jumystar bar. Ádette, kıim-keshegi altynmen aptalǵan adamdy «Altyn adam» dep aıtady. Biz altyn adam dep tolyqtaı altynnan quıylǵan adamdy aıtamyz ba, álde altynmen aptalǵan kıimmen tabylǵan adamdy ataımyz ba - anyqtap alýymyz kerek. Belbeýinen de, bas kıiminen de qalǵan altyn fragmentter jatyr. Basty másele - onyń tonalǵanynda. Kómilgennen keıin kóp ýaqyt ótpeı tonalyp, súıekti qazǵan da aıaǵynan tartyp alǵan. Sýyryp alyp, qolǵa túsken altyndaryn alyp ketken. Qalǵan fragmentteri sol jerde jatyr», - deıdi Berik Ábdiǵalıuly.
Ortalyq basshysy rekonstrýktsııa jasalǵannan keıin jádiger mýzeılerdiń birinde óz ornyn tabatynyna senimdi. Tolyqqandy kıimin qalpyna keltirýge áli de 1-2 jyldyń jumysy kerek.
«Tabylǵan bas kıimniń Almaty jaqtaǵy Esik qorǵanynan tabylǵan Altyn adamnyń bas kıimine uqsaıtyny aıtyldy. Ne desek te, zertteý jumystary tolyq aıaqtalǵannan keıin belgili bolady», - dep túıdi Berik Ábdiǵalıuly.
Eske sala ketsek, «Sakraldy Qazaqstan» ǵylymı-zertteý ortalyǵynyń basshysy Berik Ábdiǵalı Berel qorǵanynan Altyn adamnyń tabylǵanyn feısbýk paraqshasynda jarııa etken bolatyn. Іzinshe sol jaqta qazba jumystaryn júrgizip jatqan ekspedıtsııalyq toptyń basshysy Zeınolla Samashev tabylǵan jádigerge baılanysty túsinik bergen bolatyn.