Bergeı Rysqalıev pen onyń aǵasy Amanjandy Londonda kórgender bar
ASTANA. 5 qazan. QazAqparat - Bergeı Rysqalıev pen onyń aǵasy Amanjandy Londonda kórgender bar. Bul týraly Forbes Kazakhstan basylymyna ózin turaqty oqyrman retinde tanystyrǵan jáne aty-jónin atamaýdy ótingen azamat habarlady.
Ol burynǵy eki sheneýnikti dámhanada kórgenin habarlady. Oqyrmannyń aıtýynsha, ol Bergeı Rysqalıev pen onyń aǵasy Amanjan Rysqalıdi jýyrda Knightsbridge metro stansasynan alys emes jerde, Raphael Street, 5 kóshesiniń boıynda ornalasqan londondyq Zuma dámhanasynan kórgen.
Derekkózge sensek, «eki atyraýlyq» «Qazaqstannyń úshinshi astanasyna» ornalasyp alǵan. Onyń ústine, buǵan deıin BAQ-tarda habarlanǵandaı, Bergeı Rysqalıevtiń otbasy Londonda burynnan turady.
Esterińizge sala keteıik, Bergeı Rysqalıev Atyraý oblysy ákiminiń qyzmetinen bosatylǵannan keıin ol iz-túzsiz joǵaldy. Bergeı Sáýletbaıuly ustalyp, úı qamaqqa alynǵany jaıly aqparat taraǵan bolatyn, biraq ol málimetter rastalmady.
Bergeı Rysqalıevtiń týǵan aǵasy Amanjan Rysqalı óńirde birqatar kompanııalardy qadaǵalap, bıznespen aınalysqan. «Aq jol» partııasynan Parlament Májilisiniń depýtaty bolyp saılandy. Depýtattyq ókilettigin aǵymdaǵy jyldyń qyrkúıek aıynda toqtatty. A. Rysqalıdiń «Aq jol» demokratııalyq partııasyndaǵy jáne onyń prezıdıýmyndaǵy músheligi toqtatyldy.
Onymen qosa, QR Ekonomıkalyq qylmysqa jáne sybaılas jemqorlyqqa qarsy kúres agentti aǵymdaǵy jyldyń 27 qyrkúıeginde Atyraý qalasynda «AB-Group» JShS-men salynǵan turǵyn-úıdiń 9 páterin alaıaqtyq jolmen ıemdený faktisi boıynsha Amanjan Rysqalıge qatysty qylmystyq is qozǵady.
Bul burynǵy oblys ákimi Bergeı Rysqalıevtiń izdeýge jarııalanǵan ekinshi týysy. Sot sanktsııasymen burynǵy ákimniń ápkesiniń kúıeýi - Rýslan Álbaqasov izdestirilýde. R. Álbaqasovtyń kompanııasy men fırmasy birneshe jyl boıy mańyzdy áleýmettik jobalardy iske asyrýǵa bıýdjetten bólingen qarajatty jymqyryp kelgen.
