Berezov jáne Bestaý aýyldary turǵyndaryn kóshirýdi tııanaqty aıaqtaý qajet - BQO ákimi
ORAL. QazAqparat - Bórli aýdanynda júzege asyrylyp jatqan Berezov jáne Bestaý aýyldary turǵyndaryn kóshirýdi tııanaqty aıaqtaý qajet. Bul týraly Elbasy Nursultan Nazarbaevtyń tóraǵalyǵymen Býrabaıda ótken jıynda kóterilgen máselelerge qatysty bolǵan jıynda Batys Qazaqstan oblysynyń ákimi Altaı Kólginov málim etti, dep habarlaıdy «QazAqparat» tilshisi.
Ákimniń aıtýynsha, atalmysh másele Elbasy baqylaýynda tur. Qazirdiń ózinde 29 otbasyǵa úıdiń kiltteri tabys etilip, 16-sy qonystanyp úlgergen. Osyǵan baılanysty óńir basshysy aýdan ákimdigi men oblystyq qurylys basqarmasyna naqty tapsyrma júktedi.
Oblys basqarmalary, Oral qalasynyń basshylyǵy jáne selektorlyq rejımde aýdan ákimderi qatysqan jıynda Altaı Kólginov sondaı-aq azamattardy turaqty jumyspen qamtýdy qamtamasyz etýge, densaýlyq saqtaý, bilim berý basqarmalaryna qatysty memlekettik - jekeshelik seriktestikti damytýǵa kúsh salý qajettigin atap ótti. Tıisti basqarmalar basshylaryna óńirge ınvestıtsııa tartý jumystaryn kúsheıtý qajettigin eskertip, memlekettik «Nurly jol», «Nurly jer» baǵdarlamalarynyń júzege asyrylý barysy erekshe qadaǵalanatynyn jetkizdi.
«Rýhanı jańǵyrý» baǵdarlamasyn júzege asyrý boıynsha birqatar tapsyrmalar berilip, bul jumystarǵa jastardy kóptep jumyldyrý kerektigi aıtyldy. «Sonymen qatar týǵan jerge taǵzym etip, eńbegi sińgen azamattardy umytpaýymyz kerek», - dedi óńir basshysy.
Jıyn barysynda oblystyq aýyl sharýashylyǵy basqarmasynyń basshysyna oraq naýqanyn ysyrapsyz aıaqtap, Memleket basshysynyń aýyl sharýashylyǵy kooperatıvterin qurý týraly tapsyrmasyn tıisti deńgeıde oryndaý kerektigin aıtty. Elbasy tapsyrmasyna sáıkes aýdan ákimderi memlekettik jáne «Rýhanı jańǵyrý» baǵdarlamasynyń júzege asýy týraly qyrkúıek aıynan bastap buqaralyq aqparat quraldary arqyly halyq aldynda esep beretin bolady.
