Berezov aýyly turǵyndaryn kóshirýdiń ekinshi kezeńi tamyzda bastalýy tıis - BQO ákimi
ORAL. QazAqparat - Bórli aýdany Berezov aýyly turǵyndaryn kóshirýdiń ekinshi kezeńi tamyz aıynyń ortasynan qalmaı bastalýy tıis. Batys Qazaqstan oblysynyń ákimi Altaı Kólginov Qarashyǵanaqty basqarý jónindegi birikken komıtettiń Mılan qalasynda ótken kezekti otyrysynda «Qarashyǵanaq Petrolıým Opereıtıng b.v.» kompanııasynyń aldyna osyndaı mindet qoıdy, dep habarlaıdy «QazAqparat» tilshisi.
Májiliske qatysýshylar aldynda sóz sóılegen oblys basshysy óńirde jer qoınaýyn paıdalanýshy esebinen 2017 jyly jol, turǵyn úı jáne áleýmettik nysandar qurylysy boıynsha 41 jobany júzege asyrý kózdelip otyrǵanyn atap kórsetti. Muny rekordtyq kórsetkish deýge bolady. Mysaly, «QPO b.v.» kompanııasynyń áleýmettik jobalarǵa bólinetin qarjysy esebinen oblysta 70 km, sonyń ishinde Oral qalasynda 19 kóshede jol jóndeý, depo kópirin qaıta salý josparlanǵan. Jer qoınaýyn paıdalanýshy qarjysy úsh kóp qabatty turǵyn úı (273 páter), bir orta mektep pen dene shynyqtyrý-saýyqtyrý kesheni, Aqsaı qalasy men Bórli aýylynda qos birdeı balalar baqshasy qurylysyna, Oraldyń úsh kóshesi men áýejaıǵa deıingi jolda jaryqtandyrýdyń beton tirekteri men áýe jelilerin jerasty jelilerine aýystyrý, qýat únemdeıtin shamdar ornatý, áleýmettik nysandar jóndeý, ınjenerlik jeliler men joldar tartýǵa baǵyttalǵan. Budan basqa Bórli aýdany Araltal aýylynda 100 turǵyn úı qurylysy aıaqtalady.
«Barlyq jobalar ýaqtyly jáne sapaly júzege asyrylýy tıis», dedi Altaı Kólginov.
Jıynda sondaı-aq «QPO b.v.» kompanııasy tarapynan memlekettik satyp alýda jergilikti úlesti kóbeıtý baǵytynda budan bylaı da belsendi jumys jasaý jóninde ýaǵdalastyqqa qol jetkizildi. 2016 jyldyń qorytyndysy boıynsha Qarashyǵanaq jobasyndaǵy qazaqstandyq qatystyń úlesi 530 mln. AQSh dollaryna jetip, 51,6 paıyzdy qurady.
Aıta keteıik, Berezov jáne Bestaý aýyldarynyń turǵyndaryn kóshirýdiń ekinshi kezeńinde barlyǵy 1455 adam (373 úı) qonys aýdarmaqshy. Osy maqsatta Aqsaı qalasynda 9 qabatty eki úı jáne Araltal aýylynda bir qabatty 100 úı boı kóterdi.
2014 jylǵy 28 qarashada balalar jappaı gazdan ýlanǵan oqıǵadan keıin Úkimet qaýlysyna sáıkes kóshirýdiń birinshi kezeńinde 82 (Berezovtan 75, Bestaýdan 7) otbasy, barlyǵy 416 adam Aqsaı qalasynyń 5-shaǵynaýdanynda salynǵan 80 jáne 75 páterlik úılerge kóshirilgen bolatyn.
