Berezov aýyly turǵyndaryn kóshirý máselesi erekshe baqylaýda - BQO ákimi
ORAL. QazAqparat - Bórli aýdanyndaǵy Berezov aýyly turǵyndaryn Aqsaı qalasyna kóshirý máselesi erekshe baqylaýda. Bul týraly búgin «QPO b.v.» kompanııasynyń basshylarymen kezdesken oblys ákimi Altaı Kólginov málim etti, dep habarlaıdy «QazAqparat» HAA tilshisi.
Ótken jyly oblysta ónerkásip salasyn damytý men birlesken áleýmettik ınfraqurylymdyq jobalardy júzege asyrý baǵytynda aýqymdy jumystar atqarylǵanyn atap ótken óńir basshysy turǵyndardy jańa orynǵa qonystandyrýdy sońyna deıin jetkizý kerektigin aıtty. «Ol úshin 100 jeke úı men toǵyz qabatty eki úıdi merziminde paıdalanýǵa berý kerek. Sondaı-aq turǵyndar ıgiligi úshin aldaǵy oqý jylyna deıin jańa mektep, bababaqsha jáne sport keshenin salyp bitirý qajet», dedi ákim.
Oblys ákimi áleýmettik ınfraqurylymdyq jumystardy josparlaýdy erterek aıaqtap, kóktem bastalysymen-aq iske kirisýdi tapsyrdy. Bul rette ótken jylǵy oń tájirıbeni eskerýdi usyndy.
«QPO b.v.» kompanııasynyń bas dırektory Renato Marolı óz sózinde oblys ákimdigi tarapynan úlken qoldaý bar ekendigin aıtyp, jergilikti basshylyqqa alǵysyn jetkizdi.
