«Berel» qorǵandary aýmaǵynda ashyq aspan astyndaǵy mýzeı ashyldy
ASTANA. QazAqparat - Shyǵys Qazaqstan oblysynda álemge áıgili Berel qorǵandary aýmaǵynda ashyq aspan astyndaǵy mýzeı ashyldy. Bul týraly QR Mádenıet jáne sport mınıstrliginen málim etti, dep habarlaıdy QazAqparat.
Mýzeı №11 qorǵannyń aýmaǵynda ashyldy. Jobany QR Mádenıet jáne sport mınıstrliginiń tapsyrysymen «Berel» memlekettik tarıhı-mádenı mýzeı-qoryǵy júzege asyrdy.
Berel qorǵandary - Qazaqstandaǵy saq dáýiri kezeńiniń organıkalyq zattary saqtalǵan jalǵyz tarıhı eskertkish. 1998 jyldan bastap bul jerde arheologııalyq qazba jumystary júrgizilip keledi. Qorym b.z.b. V-IV ǵasyrlarda salynǵan. Qorym Buqtyrma ózeniniń oń jaǵalaýynda Berel aýylynan ońtústik-batysqa qaraı 7 shaqyrym jerde, taýly ańǵarda ornalasqan. Qorymnyń quramynda 100-den astam oba bar.
Ótken ǵasyrdyń aıaǵynda arheologtar ashqan álemdik deńgeıdegi úlken jańalyqtardyń biri -Altaıdaǵy osy Berel qorǵandary. Onda tabylǵan arheologııalyq eskertkishter, shyn mánindegi álemdik úlken jańalyq, aıtýly ǵylymı tabys retinde baǵalandy. Bul aýmaqtan ІІІ ǵasyrdyń basy - ІV ǵasyrdyń aıaǵynda ómir súrgen bolýy yqtımal aqsúıek áıeldiń tony, belbeýi jáne ábzelderimen birge eki attyń qaldyqtary, sondaı-aq altynmen aptalǵan taǵy 7 jylqynyń súıekteri tabylǵan bolatyn.
Berel qorǵandarynyń aýmaǵynda «Mádenı mura» memlekettik baǵdarlamasy aıasynda 2008 jyly QR Úkimetiniń Qaýlysymen «Berel» memlekettik tarıhı-mádenı mýzeı-qoryǵy qurylǵan bolatyn.
