«Bereke» jýrnalynyń ustanymy - «Qutty shańyraq, baıandy ǵumyr»
ASTANA. 8 qarasha. QazAqparat - Respýblıkalyq «Bereke» jýrnalynyń qarasha aıyndaǵy jańa sany jaryqqa shyqty.
Otbasynyń yrysy men berekesi artýyna úles qosýdy maqsat tutqan bul baslymnyń ustanymy - «Qutty shańyraq, baıandy ǵumyr». Jýrnalda memleket jáne qoǵam qaıratkeri, Qazaqstan Respýblıkasy Parlamentiniń birinshi shaqyrylymynda Májilis Tóraǵasy bolǵan aıtýly azamat Marat Ospanov týraly onyń jary Baqyt Ospanovamen júrgizilgen suhbat oqyrman nazaryna usynylǵan. Suhbat berýshi Marat Turdybekulynyń el ishindegi qadiri, adamı asyl qasıetteri, otbasyndaǵy úlgi-ónegesi týraly syr shertken. Artynda qalǵan murasy jaıly oılar aıtylǵan. Dástúrli ánshi Ramazan Stamǵazıevtiń «Otbasynyń basty qundylyǵy - bereke men yntymaq» dep bastalatyn oı-pikiri jarııalanǵan. Sondaı-aq, «Berekeniń qonaǵy» aıdarymen tanymal ánshi Gúlnur Orazymbettiń suhbaty berilgen. «Otbasynyń óskeni - meniń óskenim» degen taqyryppen jarııalanǵan suhbatta ánshi óz oılaryn «Otaǵasy men úshin - teńdesi joq jar, baǵa jetpes dos»,- dep túıindeıdi. Basylym osy №11 sanynda belgili ánshi Aıgúl Qosanovanyń sánge degen kózqarasyn jarııalap otyr. Sonymen qatar zerdeli oqyrmandar úshin densaýlyq kútimi, jarasymdy kıim úlgileri usynylǵan. Jýrnalda qazaq halqynyń ózindik tamaqtaný dástúri jaıly paıymdaýlar jarııalanǵan. Sondaı-aq dastarhan máziriniń sánin keltirý úshin ártúrli taǵamdar daıyndaý tásilderi berilgen. «Saıahat» aıdary boıynsha Ońtústik Koreıa eliniń ǵajap kórinisteri týraly baıandalǵan materıaldy oqýǵa bolady. Aıta ketý kerek, «Bereke» jýrnaly 2012 jyldyń aqpan aıynan bastap shyǵarylyp keledi. Az ǵana ýaqyttyń ishinde oqyrmandarynyń yqylasyna bólenip úlgirgen basylymnyń qazirgi taralymy - 20 myń dana.
