Bereke-birlikti jáne turaqtylyqty saqtaı bilý óte mańyzdy – Memleket basshysy
Memleket basshysy keshegi qańtar oqıǵalary kezinde almatylyqtar zor qaýip-qaterge tótep bergenin, syn saǵatta qala turǵyndary naǵyz otanshyldyqtyń úlgisin kórsetkenin atap ótti.
«Biz aýyzbirshiliktiń arqasynda memleketimizdi saqtap qaldyq. Men shahardy qalpyna keltirý úshin quzyrly organdarǵa naqty tapsyrmalar berdim. Almatyny órkendetý jáne jergilikti jurttyń turmys sapasyn jaqsartý – meniń aıryqsha nazarymda. Barshańyzǵa málim, men osydan birneshe kún buryn halyqqa Joldaýymdy jarııaladym. Elimizdi túbegeıli jańǵyrtýdy kózdeıtin aýqymdy reformalar usyndym. Saıası reformalar memlekettik basqarý júıesin ózgertýge baǵyttalǵan. Shyn máninde, jańa Qazaqstandy qurý degenimiz - tek memlekettik apparatty jańǵyrtý emes, búkil qoǵam, árbir adam ózgerýi kerek», - dedi Qasym-Jomart Toqaev.
Osy oraıda Memleket basshysy ár azamat elimizdiń órkendeýine óz úlesin qosýǵa umtylýy qajet ekenin aıtty.
«Búgingi almaǵaıyp, qubylmaly zamanda bereke-birlikti jáne turaqtylyqty saqtaı bilý óte mańyzdy. Osyny árqaısymyz tereń túsinýge tıispiz. Sonda ǵana bolashaǵymyz baıandy bolady. Qazir bizdiń aldymyzda zor mindetter tur jáne aýqymdy jumystar bar. Ony júzege asyrýǵa almatylyqtar barynsha atsalysaty dep senemin», - dedi Prezıdent.
Qasym-Jomart Toqaev Qazaqstan halqynyń aldynda aýqymdy mindetter turǵanyn aıtyp, barsha halyqty osy maqsattardy birlese atqarýǵa shaqyrdy.
«Tuǵyry myǵym, birligi bekem elimiz jasaı bersin! Qazaqstanymyz jasaı bersin, máńgi bolsyn! Áz Naýryz qutty bolsyn! Barshańyzǵa amanshylyq tileımin!», - dedi Prezıdent.
Budan buryn habarlanǵandaı, Memleket basshysy Qasym-Jomart Toqaev Almaty qalasynyń «Astana» alańynda ótetin merekelik sharaǵa qatysyp, barsha Qazaqstan halqyn Ulystyń uly kúnimen quttyqtady.
