Bereke-birligi jarasqan Qazaqstannyń bastamalary álem elderine ónege-ósıet
Kez kelgen merekeniń óz tarıhy bar. Sol sekildi birlik kúniniń de merekeler qataryna qosylýynyń tarıhy osydan burynǵy oqıǵalarmen tikeleı baılanysty.
«Qazaq eli adamdardy násiline qaramaı, eshkimdi de alalamaı, qushaǵyna basyp keledi. Qazaq jerine kezinde taǵdyrdyń jazýymen qadam basqan ózge etnos ókilderi osy «jeruıyq» ólkeden baqytyn tapty», - degen edi Nursultan Nazarbaev 2010 jyly 1 mamyrda Qazaqstan halqy birligi kúnimen quttyqtaý sózinde.
Elbasy elimizde etnos ókilderiniń basyn biriktiretin qutty shańyraq Qazaqstan halqy Assambleıasy osy ýaqyt aralyǵynda óziniń ómirsheńdigin dáleldegenin atap ótti.
«Biz bir otbasynyń balalaryndaı, ortaq Otannyń aıasynda ómir súrip jatyrmyz. Otany birdiń júregi bir, tilegi bir, qany men jany bir. El birligi degen qasıetti uǵym - Táýelsizdikti nyǵaıtý, tutastyqty saqtaý, ultty uıystyrý, memleketti órkendetý»,- dedi Tuńǵysh Prezıdent.
Shynymen de elimiz etnıkaaralyq beıbitshilik pen kelisimdi qamtamasyz etýde baǵaly tájirıbe jınady. Bul uǵym búgingi merekeniń rýhyna, halyqtyń rýhyna sáıkes keledi.
Bul turǵyda Elbasy ultaralyq kelisim - bul kez kelgen eldiń jáne halyqtyń júıke júıesi ekenin atap kórsetti. Sondyqtan bizdiń barlyq jetistikterimiz beıbitshilik pen kelisimniń arqasynda bolyp otyr. Álemde ultaralyq jáne dinaralyq arazdyqtyń apatty saldarynyń mysaly jeterlik. Táýelsizdik jyldary ishinde qalyptastyrǵan mundaı kelisim men beıbitshilik memlekettik jumystyń jáne bizdiń búkil qoǵamnyń qajyrly eńbegi. Bul - biz saqtaýǵa tıisti ortaq dáýletimiz.
«Mamyrdyń 1-i biz úshin shyn mánindegi shynaıy búkilhalyqtyq saltanatqa, barshamyz úshin qýanyshty, súıikti merekege aınaldy», - dedi N. Nazarbaev.
Eske salsaq, 30 jyl buryn ǵana túrli sarapshylar Ortalyq Azııa, bizdiń Qazaqstan da - jańa qaqtyǵys oshaqtaryna aınalatynyn boljaǵan edi. Olar bizdiń óńirde qantógis pen kúres júrip jatady dep oılasa kerek. Táýelsizdik jyldary Qazaqstan halqynyń elimizde etnosaralyq qarym-qatynastardyń keleshegine qatysty destrýktıvti boljamdardyń bárin joqqa shyǵardy.
«Olar etnodinı senim boıynsha ózgeshelikti alǵa tartty. Óńirdegi memleketterdiń bolashaǵy joq ári tarıh tabanynda qalady dep senimdi túrde boljam jasady. Biraq, táýelsizdik jyldary biz - Qazaqstan halqy bul destrýktıvti boljamdardyń bárin joqqa shyǵardyq», - dedi Nursultan Nazarbaev Qazaqstan halqy Assambleıasynyń XXVII sessııasynda.
Atap aıtqanda, qazaq halqynyń danalyǵy, keńdigi etnostyq tegine, áleýmettik, dinı jáne de shyǵý tegine qaramaı, memlekette barsha azamatynyń uıysýyna sebepshi boldy.
Memleket basshysy Qasym-Jomart Toqaev Qazaqstan halqynyń birligi kúnimen quttyqtaýynda Elbasy Nursultan Nazarbaevtyń bastamasymen belgilengen bul mereke ǵasyrlar boıy qazaq jerinde berik ornyqqan dostyq pen aýyzbirshilik, ózara qurmet pen senim sııaqty qasterli qundylyqtarǵa negizdelgenin qadap aıtty.
QHA aldynda jańa mindetter tur
2021 jyldyń 28 sáýirinde Qazaqstan halqy Assambleıasynyń XXIX sessııasy ótip, QHA Tóraǵasy laýazymy Qasym-Jomart Toqaevqa tapsyryldy.
Elbasy Assambleıa qurylǵan kúnnen bastap elimizdegi myzǵymas birliktiń uıytqysy, sarqylmas berekeniń bastaýy bolyp kele jatqanyn aıtqan edi. Elimizdi biriktiretin, árqaısysynyń pikirin tyńdaıtyn úlken minbe bolyp sanalady.
Osy jyldar ishinde halyqtyń tatýlyǵy, baqýat ári úılesimdi ómiri, elimizdiń qaýipsizdigi, turaqtylyq pen tynyshtyq basty orynda boldy. Bul turǵyda 1995 jyly Nursultan Nazarbaevtyń bastamasymen qurylǵan Qazaqstan halqy Assambleıasynyń da qosqan úlesi qomaqty.
«Qazaqstan Respýblıkasynyń Tuńǵysh Prezıdenti – Elbasy týraly» konstıtýtsııalyq zańǵa jáne «Qazaqstan halqy Assambleıasy týraly» Zańǵa sáıkes meniń Qazaqstan halqy Assambleıasyn ómir boıy basqarýǵa quqyǵym bar ekenin bilesizder. Bul rette Assambleıany basqarýdyń birqatar ókilettikteri el Prezıdentiniń quzyrynda. Qazaqstan halqy Assambleıasy Memleket basshysynyń mańyna toptasyp, oǵan tirek bolýy kerek. Sondyqtan men Qazaqstan halqy Assambleıasyn basqarý quqyǵyn Prezıdent Qasym-Jomart Kemeluly Toqaevqa berýdi uıǵardym. Bul sheshim Assambleıanyń múddesine saı kelip, Qasym-Jomart Kemeluly Toqaevqa barlyq jumysty, sondaı-aq halqymyzdyń, qoǵamymyz ben memleketimizdiń bolashaǵyna qatysty barlyq josparlardy júıeli qurýǵa kómektesedi dep kámil senemin», – dedi Qazaqstannyń Tuńǵysh Prezıdenti.
Óz kezeginde Qazaqstan Prezıdenti Qasym-Jomart Toqaev Nursultan Nazarbaevqa «Qazaqstan halqy Assambleıasynyń Qurmetti Tóraǵasy» mártebesin berýdi usyndy.
Memleket basshysy Assambleıany basqarý óte jaýapty jumys ekenin, sondyqtan, osy mindetti jaýapkershilikpen atqaratynyn qadap aıtty.
«Assambleıa – buryn-sońdy eshbir elde bolmaǵan biregeı qurylym. Basqa memleketter de bizdiń úlgimiz boıynsha túrli ult ókilderiniń basyn qosatyn osyndaı uıym qurýdy bastady. Búkil qoǵamdy uıystyryp, yrys-yntymaǵymyzdy arttyrý – asa ózekti másele. Biz árqashan «Bereke basy – birlikte» degen qasterli qaǵıdany ustandyq. Qazaqstan otyz jyl ishinde halqy tatý, jeri tynysh, qoǵamy turaqty memleketke aınaldy. Bul – shyn máninde, maqtan tutarlyq jetistik. San túrli ulystyń basyn biriktirip, bir maqsatqa jumyldyrý – ońaı sharýa emes. Bul – tabandylyqty talap etetin kúrdeli jumys», - dedi Q. Toqaev.
Prezıdent qasterli Táýelsizdigimizdiń 30 jyldyǵynda Assambleıa halyqtyń talap-tilekterin oryndaýǵa baǵyttalǵan naqty jobalardy júzege asyrýǵa aıryqsha mán berýi kerektigin aıtty.
«Barshamyzǵa ortaq jumystyń basty baǵdary dál osyndaı bolýǵa tıis. Biz bárimiz birlik pen yntymaqtyń arqasynda jasampaz ult bolyp, aldymyzda turǵan tarıhı maqsattarǵa qol jetkizemiz. Barshańyzdy alda kele jatqan Qazaqstan halqynyń Birligi kúnimen quttyqtaımyn!», - dedi Memleket basshysy.
