Bereke Bank ınvestor izdep jatyr

ASTANA. QazAqparat – Qarjy naryǵyn retteý jáne damytý agenttiginiń tóraǵasy Mádına Ábilqasymova Bereke Bank aktsııalary qashan satylady degen suraqqa jaýap berdi, dep habarlaıdy QazAqparat tilshisi.

«Ázirge jaǵdaı mynadaı – 8 naýryzda biz ony SDN paraǵynan shyǵardyq. Qazir onyń kórsetkishteri jaqsy, kapıtaldyń jetkiliktigi – 10%. Endi banktiń aktsıoneri sanalatyn «Báıterek» (ulttyq basqarýshy holdıng) Bereke Bank aktsııasyn satý úshin ınvestor izdeý jumysyn bastaıdy», - dedi Mádına Ábilqasymova VIII saılanǵan Parlamenttiń birinshi sessııasynyń otyrysynan keıin jýrnalısterge.

Agenttik basshysy Bereke Bank úshin bıýdjet qarajaty paıdalanylmaǵanyn aıtty.

«Eń aldymen banktiń qarajaty paıdalanyldy. Bereke Bank satyp alý úshin bıýdjet qarajatynyń bir tıyny da jumsalmaǵan. Sondaı-aq memlekettik kómek kórsetilmedi», - dedi Mádına Ábilqasymova.

Agenttik tóraǵasy qazirgi ýaqytta banktiń áleýetti satyp alýshylary bar ma degen suraqqa da jaýap berdi.

«Ázirge joq. Bizge «Báıterek» áli aqparat bergen joq. Olar bul jumysty endi bastady», - dep túsindirdi agenttik tóraǵasy.