Bereke Bank 100 mlrd teńgege oblıgatsııa shyǵarady
ASTANA. KAZINFORM – Bereke bank 100 mlrd teńgege (árqaısysynyń nomınaldy quny myń teńgeden) 100 mln oblıgatsııa shyǵarylymyn jarııalady.
Bul banktiń tórtinshi oblıgatsııalyq baǵdarlamasy bolmaq. Oblıgatsııalardyń aınalym merzimi úsh jyldy quraıdy, syıaqy jylyna eki ret tólenedi.
«Jyldyq syıaqy mólsherlemesi Qazaqstan Respýblıkasy Ulttyq bankiniń kýpondyq kezeńde áreket etetin bazalyq mólsherlemesiniń 0,3% belgilengen marjany alyp tastaǵandaǵy ortasha máni retinde esepteledi», - delingen Bereke bank habarlamasynda.
Bank naqtylaǵandaı, saýda-sattyqtyń bastalýy týraly aqparat keıin Qazaqstan qor bırjasynyń (KASE) saıtynda jarııalanady.
Buǵan deıin KASE 2024 jyldyń 1 shildesinen bastap burynǵy oblıgatsııalyq baǵdarlama boıynsha qoldanysta bolǵan Bereke Bank oblıgatsııalary aınalym merziminiń aıaqtalýyna baılanysty KASE resmı tiziminen shyǵarylǵanyn habarlaǵan.
Bul oblıgatsııalar KASE resmı tizimine 2023 jyldyń 1 qyrkúıeginde «kommertsııalyq oblıgatsııalar» sanatynda engizilgen. Olardaǵy saýda 2023 jyldyń 13 qyrkúıeginde ashyldy.
Eske sala ketsek, katarlyq Lesha bank «Báıterek» ulttyq holdınginen Bereke bank-ti satyp aldy. Kelisim 2024 jyldyń 31 naýryzynda jasalǵan. Mámile somasy 65 mlrd teńgeni qurady.
Bereke bank-ti katarlyq Lesha bank-ti satý boıynsha mámileniń aıaqtalýy shamamen bıylǵy shilde aıynyń sońynda kútilýde.
«Bereke» bankin satýdan túsken aqsha Ulttyq qorǵa túsedi.
