Berdibek Saparbaevtyń mektep janyndaǵy lagerlerge kóńili tolmaıdy
ASTANA. QazAqparat - Búgin Úkimettiń selektorlyq rejimdegi otyrysynda Aqtóbe oblysynyń ákimi Berdibek Saparbaev mektepterdiń janyndaǵy jazǵy demalys lagerlerine kóńili tolmaıtynyn aıtty, dep habarlaıdy QazAqparat tilshisi.
«Mektep janyndaǵy lagerlerge qatysty aıtarym, balalar 9 aı mektepte bolady, odan keıin taǵy da 3 aı mektepte júredi. Shynyn aıtsaq, mektep janyndaǵy lagerlerdiń kóbisi durys jasamaıdy. Bizdiń usynymyz, shatyrlyq, eńbek, sporttyq lager, eń negizgisi óńiraralyq lagerler uıymdastyrý kerek. Máselen, Shyǵys Qazaqstan, Almaty oblystarynyń tabıǵatymen bizdiń tabıǵatty salystyrýǵa bolmaıdy. Biz endi sol jaqqa balalardy kóbirek jibersek, qatarlastarymyn tanysyp, tabıǵatty tamashalap jaqsy demalar edi», - dedi Aqtóbe oblysynyń ákimi.
Osy rette Úkimet basshysy Baqytjan Saǵyntaev óńiraralyq lagerlerdi uıymdastyrý eshqandaı problema emestigin aıtty. «Áriptesterińizben kelisip, oryn bolsa jibere jatarsyzdar. Óıtkeni ol jerdegi balalar da sol lagerlerge baryp demalǵysy keledi. Al mektep janyndaǵy lagerlerdi shatyrlyq, kıiz úılik lagerler retinde uıymdastyrý qoldaryńyzdaǵy dúnıe ǵoı. Mekteptiń janynan emes Oıyldyń ba, Yrǵyzdyń ba janynan uıymdastyryńyz», -dep usyndy Premer-Mınıstr oblys ákimine.
Alaıda Berdibek Saparbaev aldaǵy ýaqytta Bilim jáne ǵylym mınıstrligi mektepterdiń janyndaǵy lagerlerdi azaıtyp jiberdińder dep syn aıtýy múmkin ekendigin atap ótti.
«Erlan Kenjeǵalıuly suraıyz ba, suramaısyz ba?», - dep qaıyryldy Úkimet basshysy Bilim jáne ǵylym mınıstri Saǵadıevke.
«Ony suramaımyz. Arnaıy ındıkatorymyz joq. Biraq, mekteptiń janyndaǵy lagerlerdiń kópshiligi sportqa arnalǵan. Fýtbol, basketbol oınaıdy. Mundaı lagerler kerek», - dep jaýap berdi Erlan Saǵadıev.
