Berdibek Saparbaev jyldy jalaqy jáne salyq beresheginsiz aıaqtaýdy tapsyrdy
TARAZ. Qazaqparat – Bıylǵy 11 aıdyń qorytyndysy boıynsha Jambyl oblysynyń áleýmettik-ekonomıkalyq damýynyń kórsetkishteriniń basym bóligi oıdaǵydaı oryndalǵan. Bul týraly oblys ákimi Berdibek Saparbaevtyń tóraǵalyǵymen ótken apparat májilisinde ekonomıka jáne bıýdjettik josparlaý basqarmasynyń basshysy Gúldana Jaýynbekova málimdedi, dep habarlaıdy QazAqparat tilshisi.
Óńirdegi óndiristik ónerkásip, aýyl sharýashylyǵy, qurylys, saýda, kólik jáne baılanys sekildi alty negizgi salanyń damý dınamıkasy aıryqsha mańyzdy desek, osy turǵyda qysqa merzimdi ekonomıkalyq ındıkatordyń ósimi 102,5 paıyzdy qurap otyr.
G.Jaýynbekova sondaı-aq QR Premer-Mınıstri men oblys ákiminiń arasyndaǵy memorandýmynda belgilengen ındıkatorlardyń oryndalýy týraly baıandady. Qazirgi tańda 22 ındıkatordyń 18-ine qol jetkizilse, bireýi asyra oryndalǵan. Al, 3 ındıkatorǵa qol jetkizilmedi. Ónerkásip ónimderiniń eksporty men negizgi kapıtalǵa salynǵan ınvestıtsııalardyń ósý kórsetkishteri tómen bolǵan. Al, úshinshi ındıkatordyń oryndalmaýyna ana ólimi áser etken.
Ótken kezeńde oblystyq bıýdjettiń atqarylýy kirister boıynsha 102 paıyzdy qurasa, salyqtyq túsimder 110,3 paıyzǵa qamtamasyz etilgen. Bul rette oblys boıynsha bıýdjet qarajatyn ıgerý 99,4 paıyzdy qurady. Qarjy basqarmasynyń basshysy Roza Isaevanyń aıtýynsha, búgingi tańda ıgerilmegen 2 mıllıard 493 mıllıon teńge qalyp otyr. Bıýdjet qarajatynyń ıgerilmeýiniń negizgi sebepteri retinde jumystyń kesh bastalýy, taýarlardyń ýaqytyly jetkizilmeýi ataldy.
Berdibek Saparbaev aýdandar men Taraz qalasynyń ákimderine bólingen bıýdjet qarajatyn ıgerýge jáne 2020 jylǵa belgilengen mindettemelerdi oryndaýǵa bar kúsh-jigerdi salýdy tapsyrdy. Ol sonymen qatar iri kásiporyn basshylarynyń jyldy jalaqy men salyq beresheginsiz aıaqtaýyna nazar aýdardy.
«Jalpy, jyl tabysty aıaqtalýda. Biraq qalǵan ýaqytta da bárimiz aıanbaı eńbek etýimiz kerek. Aldymen, jyl basynda qabyldanǵan mindettemelerdiń oryndalýyn, jalaqy men salyq qaryzdaryn tólenýin qamtamasyz etý qajet», - dedi ol.
Sondaı-aq, oblys ákimi koronavırýs boıynsha jaǵdaı áli de alańdatarlyq kúıde ekenin atap ótti. Osyǵan baılanysty monıtorıngtik toptar óz jumystaryn jandandyrýy tıis. Basqosýda merekeler aldyndaǵy azyq-túlik baǵasynyń sharyqtap ketpeýine erekshe kóńil bólindi.
