Berdibek Saparbaev jolaýshylardy tasymaldaıtyn barlyq avtobýstardy tekserýdi tapsyrdy
AQTÓBE. QazAqparat - Aqtóbe oblysynyń ákimi Berdibek Saparbaev jolaýshylar tasymalymen turaqty aınalysatyn kólik quraldarynyń tehnıkalyq jaǵdaıyn tekserýdi tapsyrdy, dep habarlaıdy QazAqparat tilshisi.
Buǵan deıin habarlaǵanymyzdaı, óńir basshysy eńbek demalysynan soń birden aýrýhanaǵa baryp, avtobýs órti kezinde aman qalǵan adamdardyń jaǵdaıyn bilgen bolatyn.
Keıin ákimdikte jıyn ótkizip, memlekettik organdarǵa joldarda baqylaýdy kúsheıtýdi, sondaı-aq turaqty túrde jolaýshylar tasymalyn júzege asyratyn kólik quraldarynyń tehnıkalyq jaǵdaıyn tekserýdi tapsyrdy.
«Aqtóbe oblysy halyqaralyq kólik aǵyny ótetin tranzıttik óńir bolyp tabylady. Bolashaqta osyndaı jaǵdaıdy boldyrmaý úshin kólik baqylaý ınspektsııasy, jergilikti polıtsııa qyzmeti kólik prokýratýrasymen birlese osy baǵyttaǵy jumystardy kúsheıtýleri kerek. Bizdegi qalaaralyq jáne halyqaralyq tasymalmen aınalysatyn barlyq avtobýstardy tekserý qajet», -dedi Berdibek Saparbaev.
Oblys ákimdigi baspasóz qyzmetiniń habarlaýynsha, óńir basshysy Yrǵyz aýdanyndaǵy avtobýs órtengen jerde jumys istegen barlyq shuǵyl jáne jedel qyzmetterge alǵysyn bildirdi.
«Qutqarý qyzmetteri, medıtsına qyzmetkerleri, quqyq qorǵaý organdarynyń qyzmetkerleri men barlyq memlekettik organdar táýlik boıy úılesimdi ári jedel túrde jumys istedi. Sol úshin sizderge kóp rahmet. Eń aldymen Ózbekstan tarapy rızashylyǵyn jetkizdi. Bizdiń tarapymyzdan olarǵa jan-jaqty qoldaý men kómek kórsetildi. Bul suraq birinshi kúnnen bastap-aq Memleket basshysynyń jeke baqylaýynda»,- dep atap ótti oblys ákimi.
Eske salaıyq, 18 qańtar kúni tańǵy 10:30 shamasynda Yrǵyz aýdanynyń Qalybaı aýylyna jaqyn mańda Qazaqstannan Reseıge bet alyp bara jatqan avtobýstan órt shyǵyp, 52 jolaýshy qaza boldy. 5 jolaýshy órtten shyǵyp úlgerdi, olardyń ekeýi Ózbekstan azamaty, úsheýi qazaqstandyqtar.
Negizgi boljam boıynsha, qaıǵyly oqıǵa órt qaýipsizdigi talaptaryn saqtamaýdan bolǵan.
«Otty salǵyrt paıdalanǵandyǵy jónindegi boljam aman qalǵandardyń túsiniktemelerimen rastalyp otyr. Avtokóliktiń qozǵaltqyshy óship qalyp, kóliktiń ishi salqyn bolǵan, sol kezde dánekerleıtin sham jylytqysh retinde qoldanylǵan. Ol eki saǵattan astam ýaqyt jumys jasaıdy. Sol kezde bes lıtrlik ydystaǵy benzın tógiledi de, ot lap etedi. Sóıtip, az ýaqytta avtobýs ishindegi azamattardyń barlyǵynyń ómirin jalmaıdy. Sondaı-aq, jol-kólik oqıǵasy nemese qandaı da bir krımınaldyq jaǵdaıdyń bolýy múmkin degen boljamdar tolyqtaı joqqa shyǵaryldy. Oqıǵa ornyn tekserý aıaqtalǵannan keıin atalmysh avtokólikten eshqandaı sýyq qarý, atys qarýy, oq-dári nemese sol oq-dárilerdiń qaldyqtary tabylmady», - dedi QR ІІM mınıstriniń orynbasary Erlan Turǵymbaev.
