Berdibek Saparbaev jer qoınaýyn paıdalanýshylardan óz mindetterin oryndaýyn talap etti
Energetıka mınıstrligi men ınvestıtsııalar jáne damý mınıstrligi aradaǵy kelisimge sáıkes, óńirdegi jer qoınaýyn paıdalanýshylardyń kelisimsharttyq mindetterin oryndaýlaryna qatysty kóshpeli jınalys Aqtóbe qalasynda jarty jyl saıyn ótedi. 2016 jyly ótkizilgen jınalystardyń nátıjesiniń biri qatty paıdaly qazbalar boıynsha birneshe kelisimshartty buzý jáne kómirsýtek shıkizaty boıynsha kelisimshartty buzýǵa tórt eskertý habarlamasyn jiberý boldy.
Qoldanylyp jatqan sharalarǵa qaramastan keıbir jer qoınaýyn paıdalanýshylar ózderiniń kelisimsharttyq mindetterine mán bermeı keledi. Atap aıtqanda, búginde óńirde tirkelgen qatty paıdaly qazbalar óndiretin 19 jer qoınaýyn paıdalanýshynyń altaýy mindetterin 30%-dan tómen oryndap otyr. Sondaı-aq, kómirsýtek shıkizatyn óndirýdi júzege asyratyn 30 jer qoınaýyn paıdalanýshynyń toǵyzy mindetterin 30-50%-dan tómen oryndap otyr.
«Aýtsaıderlerdiń qatarynda jyl saıyn sol baıaǵy kompanııalar bolyp otyr. Osyǵan baılanysty óńirdi áleýmettik-ekonomıkalyq damytý maqsatynda tıisti mınıstrlikterdiń basshylyǵynan sońǵy úsh jylda óz mindetterin oryndamaǵan jer qoınaýyn paıdalanýshylardyń kelisimsharttaryn buzý boıynsha sharalardy qoldanýdy, sonymen qatar, budan buryn buzylǵan kelisimsharttar boıynsha ınvestorlardy izdeýge qolǵabys etýin suraımyn. Jer qoınaýy óńir ekonomıkasyna, halyqtyń ıgiligi úshin jumys jasaýy qajet», - dep atap ótti oblys ákimi Berdibek Saparbaev.
Energetıka vıtse-mınıstri Áset Maǵaýov memlekettiń jer qoınaýyn paıdalanýshylarǵa árqashan úlken qoldaý kórsetkenin jáne soǵan sáıkes qaıtarymyn kútetinin atap ótti.
«Biz mınıstrlik tarapynan, bylaısha aıtqanda, tek baqylaý, jazalaý qyzmetterin ǵana atqaryp qoımaımyz, biz dúnıejúzilik kómek te kórsetemiz. Máselen, Aqtóbe oblysyndaǵy kompanııalardyń bir bóligi paıdaly qazbalardy óndirý salyqtary boıynsha jeńildikter aldy. Energetıka mınıstrliginiń janynda kompanııa shyǵynǵa ushyraǵan jaǵdaıda oǵan qoldaý kórsetip, salyq mólsherin tómendetetin arnaıy komıssııa bar. Oblystyń qolda bar áleýeti júzege asyrylýy úshin, biz, árıne, jer qoınaýyn paıdalanýshylar tarapynan kelisimsharttyq mindetter men ken oryndaryn ıgerýge ketetin ınvestıtsııalardy sáıkesinshe oryndaýlaryn kútemiz», - dep túsindirdi vıtse-mınıstr.
Jınalys aıasynda sondaı-aq, jer qoınaýyn paıdalanýǵa, sonyń ishinde ken oryndaryn izdeý, barlaý jáne ıgerý suraqtarynda jańa tehnologııalardy tartý jaǵy talqylandy.
«Jańa tehnıkalardy, tehnologııalardy qoldanýdyń mańyzy zor. Búginde oblys aýmaǵynda ornalasqan keıbir kompanııalardyń jańa tehnologııalardy qoldanatynyn jáne óndirý ósiminiń baryn bilemin. Árıne, ol úshin ǵylymı turǵydan da qaraǵan jón, ken ornyn muqııat zerttep, neǵurlym jaqsy nátıje alý úshin búginde munaı-gaz salasynda bar kóptegen ádis-tásilderdi zertteý qajet. Eger biz geologııalyq barlaý jumystaryn belsendi júrgize almasaq, jańa ken oryndaryn ashyp, jańa resýrstardy ıelenbesek, salany osy tehnologııalarmen kóterý múmkin emes. Ókinishke qaraı, geologııalyq barlaý jumystary jaı júrýde, ázirge tıimsiz. Buǵan qosa, bizder geologııalyq barlaý jumystaryn júrgizýdi Respýblıka aldynda mindetine alyp, búginde óz mindetterin oryndamaı júrgen ondaǵan jer qoınaýyn paıdalanýshylardy kórip turmyz. Shyn máninde, munyń artynda jer qoınaýyn paıdalanýshylarmen sheshilmeı júrgen úlken memlekettik tapsyrma tur», - dep belgiledi «KAZENERGY» qaýymdastyǵy tóraǵasynyń orynbasary Uzaqbaı Qarabalın.
Jıyndy túıindegen Berdibek Saparbaev oblys ákimdiginiń energetıka mınıstrligi men ınvestıtsııalar jáne damý mınıstrliginiń qoldaýymen jer qoınaýyn paıdalanýshylardyń qarjylyq mindetterdiń jalpy kólemindegi, ınvestıtsııalaý jáne óndirý, geologııalyq barlaý, óńirdiń áleýmettik-ekonomıkalyq damýyna aýdarym jasaýdaǵy jáne taǵy da basqa kelisimsharttyq mindetterin oryndaý suraqtaryn ári qaraı da qatań baqylaýda ustaıtynyn atap ótti.
