Berdibek Saparbaev jaıylymdyqty bólise almaǵan aýyl turǵyndarymen kezdesti
Jalpy, Tereńózek aýyldyq okrýgi aýmaǵyndaǵy jaıylymdyq jer kólemi 42233 gektardy quraıdy. Mal baǵýǵa arnalǵan osyndaı aýqymdy aýmaq bola tura, jergilikti turǵyndar ózara kelisimge kele almaýda.
Tereńózektikter ózderi aıtqandaı, aýyldaǵy kóptegen otbasylar qoralarynda onshaqty iri qara jáne usaq maldar men jylqylar ustaıdy. Keıbireýlerindegi mal sany júz basqa deıin jetedi. Úsh myńnan astam adam turatyn aýyldyq okrýgte 2493 iri qara, 34625 usaq mal jáne 1144 jylqy bar. Barlyǵy 85 sharýa qojalyǵy tirkelgen.
Jaqynda ǵana 2305 adam turatyn Tereńózek aýylynyń turǵyndary áleýmettik jelilerde jaıylymdyq jerlerdiń jetispeýshiligin aıtyp, shaǵymdanǵan bolatyn.
Kezdesý barysynda T.Rysqulov aýdanynyń ákimi Erbolat Sadyrqulov turǵyndar arasyndaǵy kelispeýshilik aýyl irgesindegi jaıylymdyq jerlerge qatysty týyndaǵanyn atap ótti. Alaıda, ol bul jerlerdi bólý bekitilgen normalarǵa sáıkes júrgizilgenin jetkizdi. Ol turǵyndarǵa aýyl syrtyndaǵy 12622 gektar jaıylymdyq jerlerdi paıdalaný boıynsha usynys bildirgen.
Jergilikti turǵyn Alpys Dúrmenov jer bólý kezinde ár aýladaǵy adam sany eskerilmegenin alǵa tartady.
«Menińshe, jaıylymdyq jerler balalar sanyna qaramaı, ártúrli bólinýde. Kóp balaly otbasylarǵa da, bir balaly otbasylarǵa da birdeı kólemdegi jaıylym tıedi», - dedi ol.
Oblys ákimi kez kelgen másele zań sheńberinde sheshiletinin atap ótti.
«Eshqandaı jer paıdalanýsyz jatpaýy kerek, ol tabys ákelýi tıis. Sondyqtan bir apta ishinde aýdan jáne aýyl ákimderi osy eldi meken mańyndaǵy jerlerge taldaý júrgizedi. Paıdalanýsyz jatqan jerlerdi ıeleri memleketke qaıtarýy kerek. Ol
jergilikti turǵyndarǵa mal sanyna sáıkes bólinedi», - dep túsindirdi Berdibek Saparbaev.
Degenmen, aımaq basshysy maldyń negizgi bóligi aýyl syrtyǵyndaǵy jaıylymdarda jaıylýy tıistigin tilge tıek etip, onda jerdiń jetkilikti ekendigin basa aıtty.
«Qalaı desek te, aýyldyń irgesindegi jer bárine birdeı jetpeıdi. Sondyqtan, malshy jaldap, alysqa jaıýǵa týra keledi. Sondaı-aq, mundaı shaǵyn aýmaqta 80-nen astam sharýa qojalyǵynyń bolýy – óte kóp, olardy biriktirý qajet. Buǵan jergilikti aqsaqaldar atsalysqany abzal. Jalpy, bul máselelerdiń barlyǵyn aýyldyń burynǵy ákimi sheshýi kerek edi», - dep atap ótti óńir basshysy.
Sondaı-aq, Berdibek Saparbaev Tereńózek turǵyndaryna aýyl sharýashylyǵy daqyldaryn ósirýde úı mańyndaǵy jerlerdi tıimdi ıgerýdiń mańyzdylyǵyna toqtaldy.
Kezdesý barysynda basqa da ózekti jaıttar qaýzalyp, aýyl sharýashylyǵy ónimderin qaıta óńdeý máselesine de den qoıyldy.
