Berdibek Saparbaev «Januıa» otbasy ınstıtýtyn qoldaý ortalyǵynda azamattardy qabyldady
NUR-SULTAN. QazAqparat - 7 jeltoqsan kúni QR Premer-Mınıstriniń orynbasary Berdibek Saparbaev elordadaǵy «Januıa» otbasy ınstıtýtyn qoldaý ortalyǵynda azamattardy qabyldady, dep habarlaıdy QazAqparat QR Úkimetiniń baspasóz qyzmetine silteme jasap.
Astana turǵyndary medıtsınalyq kómek kórsetýge, áleýmettik qyzmetterge, turǵyn úımen jáne dári-dármektermen qamtamasyz etýge, eńbekke ornalastyrýǵa qatysty jáne basqa da problemalyq máselelerdi kóterdi.
Egde tartqan múgedek anasyna kútim jasap otyrǵan Elena Solonık áleýmettik kómek organdary usynatyn ońaltý jáne gıgıena quraldarynyń sapasynyń tómendigine jáne olarmen ýaqytyly qamtamasyz etilmeıtinine shaǵymdandy.
«8 jyl buryn satyp alǵan arbamyz bizge bıyl berilgen múgedekter arbasynan áldeqaıda sapaly. Gıgıena quraldaryn biz keshe ǵana aldyq, olardyń sapasy da tym tómen», - dedi E. Solonık.
Vıtse-premer qalanyń jumyspen qamtý jáne áleýmettik qorǵaý basqarmasyna osy máseleni sheshýdi jáne múgedek jandardy sapaly ońaltý jáne gıgıena quraldarymen qamtamasyz etýdi tapsyrdy.
«Biz bul problema týraly bilemiz. Ol tek sizdiń otbasyńyzǵa ǵana emes, elimizdegi barlyq múgedekterge qatysty. Sondyqtan kelesi jyldan bastap biz Áleýmettik qyzmetter portalyn iske qosamyz. Ol qazirdiń ózinde Aqtóbe oblysynda pılottyq rejımde jumys istep jatyr. Osy portal arqyly múgedek jandar óz betinshe kórsetiletin qyzmetter men tehnıkalyq ońaltý quraldaryn tańdaı alady», - dedi B. Saparbaev.
Nýzıgúl Aqan óziniń ulyna múgedektik tobyn berý máselesin sheshýde kómek kórsetýdi surady. Jas jigittiń júregine kúrdeli operatsııa jasalǵan, oǵan taǵy ota jasatý kerek.
Qajetti tekserýler júrgizip, qoldanystaǵy zańnama sheńberinde osy máseleni sheshý densaýlyq saqtaý jáne áleýmettik qorǵaý organdaryna tapsyryldy.
Bul kúni vıtse-premer barlyǵy 12 azamatty qabyldady. Júgingen azamattardyń barlyq ótinishteri men usynystaryn tyńdaǵan soń Berdibek Saparbaev túsinik berip, tıisti memlekettik organdarǵa zańnama aıasynda máselelerdi sheshýde yqpal kórsetýdi tapsyrdy.
