Berdibek Saparbaev Jańaózendegi birneshe áleýmettik nysandy aralady
Aldymen jumys toby qaladaǵy óndiristik alańnyń jumysymen tanysty. 30 gektar aýmaqty alatyn tehnoparktiń negizgi mindeti ónim óndirý salasyndaǵy jumys jasaıtyn kásipkerlerdi bir jerge ornalastyrý.
Osy ýaqytqa deıin alańǵa ishki jáne syrtqy ınjenerlik jeliler tartylyp, ákimshilik ǵımaraty men angar salynyp, bólingen qarajat tolyǵymen ıgerilgen. Qazirgi tańda, Jańaózen qalasy ákimdigi jáne «Atameken kásipkerler palatasy» arasynda jumys toby qurylyp, «Bıznestiń jol kartasy - 2020» bıznesti qoldaý jáne damytýdyń biryńǵaı baǵdarlamasy aıasynda óndiristik alańnan kásipkerlerge jer ýchaskelerin Óńirlik úılestirý komıssııasy arqyly bólý jumystary talqylanýda.
Búgingi kúnge deıin óndiristik alańǵa ornalasý boıynsha 37 kásipkerden usynys túsken. Onyń ishinde jıhaz óndiretin tseh, tigin sheberhanasy, qaǵaz, polıetılen paketin óndirý jáne t.b. bar. Munan soń jumys toby qaladaǵy medıtsınalyq ortalyqtyń qurylysymen tanysty.
Osyǵan deıin «Qazmunaıgaz Injınırıng» JShS qarasty «QazNIPImýnaıgaz», «Ózenmunaıgaz» AQ, Mańǵystaý oblystyq densaýlyq saqtaý basqarmasy ókilderiniń qatysýymen arnaıy komıssııa otyrysy ótip, onda medıtsınalyq ortalyq qurylysyn jandandyrý maqsatynda atqarylatyn sharalar legi talqylanǵan bolatyn.
Ortalyq qurylysyn kezeń-kezeńimen júrgizý sharalaryna naqty merzim bekitilip, medıtsınalyq ortalyq qurylysyn 2020 jyly paıdalanýǵa berý týraly tapsyrma berildi.
Sonymen qatar, kásipkerlerge qyzmet kórsetý ortalyǵyna da bardy. Onda «Atameken» Ulttyq kásipkerler palatasynyń Jańaózen qalasyndaǵy fılıalynyń, ondaǵy ózine-ózi qyzmet kórsetý aımaǵynyń, qyzmetkerleriniń jumys barysymen tanysty.
Osyǵan deıin Jańaózen qalasyna QR «Atameken» Ulttyq kásipkerler palatasynyń Basqarma Tóraǵasy Abylaı Myrzahmetovpen birge jumys toby kelgen bolatyn. Jumys toby 2 apta boıy Jańaózen qalasyndaǵy kásipker mamandarmen kezdesti. Arnaıy Nur-Sultan qalasynan kelgen mamandar jeke jáne zańdy tulǵalardy aqparattandyryp, qalalyq kásipkerlik jáne aýyl sharýashylyq bóliminiń mamandarymen birlese otyryp kásipkerlik salasyndaǵy máselelerdi, onyń sheshý joldaryn qarastyryp, kásipkerlerge qyzmet kórsetti.
Qazirgi tańda Jańaózen qalasynda 7 qazanda bastalǵan «Kásip túbi-násip» jobasy nátıjeli júzege asyrylýda. Búgingi kúnge deıin jobanyń jumys toby 500-ge jýyq adamǵa keńes berdi. Onyń 15% qarjy qyzmetteri boıynsha, 10%- marketıngtik, 10% quqyqtyq keńes berý t.b.quraıdy.
Jańaózen qalasynda jumyssyzdyqty boldyrmaý maqsatynda kásiporyndarmen birlesip 5 oqý kýrsy ashyldy. Olarda naryqqa qajetti tigin, avtoelektrık, robototehnık, gazelektr dánekerleýshi, kran júrgizýshisi mamandary oqytylatyn bolady. Joba aıasynda «Bastaý bıznes» boıynsha 140 adam oqytyldy. «Basta» alańynda tabysty kásipkerler 300-deı adamǵa kásip syryn úıretti. Mıkro qarjy uıymynyń keńesshileri 70 adamǵa keńes berip, naqty 4 adamnyń kásip ashýyna nesıege qujat jınaqtady.
Memlekettik satyp alýlar boıynsha 50 kásipkerge arnalǵan trenıng uıymdastyryldy. Úkimet músheleri arnaıy barǵan taǵy bir nysan Jańaózen qalasyna qarasty Rahat aýylynda «Jaqsy» sport kesheni. Aýmaǵy 2000 sharshy metrdi quraıtyn keshen aýyl balalarynyń sportpen shuǵyldanýy múmkindik berilip, ár túrli sport sektsııalary esigin aıqara ashty. Sport kesheninde qazirgi tańda boks, erkin kúres, karate-do, dzıýdo, shaǵyn fýtbol jáne aýyr atletıka sııaqty basqa da túrleri qamtylǵan. Jastardy jattyqtyrýǵa 25 bapker jumysqa qabyldanǵan.