Berdibek Saparbaev Jańaózen turǵyndarymen kezdesti
Kezdesýge Mańǵystaý oblysynyń ákimi Serikbaı Turymov, eńbek jáne áleýmettik qorǵaý mınıstri Birjan Nurymbetov, vıtse-mınıstrler: bilim jáne ǵylym - Sholpan Karınova, densaýlyq saqtaý - Lázzat Aqtaeva, mádenıet jáne sport - Eldos Ramazanov, aqparat jáne qoǵamdyq damý - Danııa Esin, sonymen qatar kásipodaq fedratsııasynyń tóraǵasy Eraly Tuǵjanov qatysty.
Vıtse-premer sóz sóıleý kezinde turǵyndardy Memleket basshysynyń azamattardyń ál-aýqatyn arttyrý, bilim berý, densaýlyq saqtaý, áleýmettik qorǵaý salalaryn damytýǵa arnalǵan tapsyrmasynyń júzege asý barysynan habardar etti.
Berdibek Saparbaev jańaózendikterdi memleketti, onyń ishinde «Eńbek» baǵdarlamasyn qoldap túrli sharalar uıymdastyrýǵa shaqyrdy.
«Birge jumys istep, qıyn máselelerdi sheshý, azamattardyń ómir sapasyn jaqsartyp, jumyspen qamtylýyn qadaǵalaý – bizdiń ortaq mindetimiz. Eger arnaıy mamandyǵy joq bolsa – «Eńbek» baǵdarlamasy boıynsha kásibı bilim alyp, kásipkerliktiń qyr-syryn úırenip, qaıtarymsyz grant nemese jeńildikpen mıkrokredıt alýǵa bolady. Bastysy, bos otyrmaý kerek», - dep atap ótti Úkimet basshysynyń orynbasary.
Onyń aıtýynsha, úkimet oblys ákimdigimen jáne «Atameken» UKP birigip Jańaózenniń eńbek naryǵyn zerttep, 2 myńǵa jýyq jumyssyz azamattar baryn anyqtaǵan.
«Biz olardy jumyspen qamtyp, granttar men mıkronesıeler bólip, kásipkerliktiń qyr-syryna úıretip, biliktiligin arttyryp, jańa jáne jumys istep turǵan kásiporyndarǵa jumysqa turǵyzýǵa nıettimiz», - dedi Berdibek Saparbaev.
Vıtse-premer sóz sóılegennen keıin kezdesý «erkin mıkrofon» formatynda jalǵasyn taýyp, jańaózendikter ózderin alańdatqan suraqtardy qoıdy.
Qala turǵyndary eńbekke tartý, kóshelerdi sapasyz tazalaý men kógaldandyrý, eski úılerdi buzý, turǵyn úı máselelerin sheshý, az qamtylǵan jáne kóp balaly otbasylardy qoldaý ortalyǵyn ashý syndy máselelerdi kóterdi. Barlyq suraqtarǵa tıisti jaýap berilip, túsiniktemeler aıtyldy.
19 jeltoqsan, beısenbi kúni Úkimettiń jumys toby Aqtaýdaǵy jumysyn jalǵastyryp, aımaq turǵyndarymen, densaýlyq saqtaý, bilim berý salasynyń qyzmetkerleri, jastarmen kezdesip, birqatar áleýmettik oshaqtardy aralaıdy.
