Berdibek Saparbaev Jambyl oblysynda iske asatyn jobaǵa baǵa berdi
NUR-SULTAN. QazAqparat – Búgin Úkimet otyrysynda Jambyl oblysy halqynyń tabysyn arttyrýǵa baǵyttalǵan ilki joba tanystyryldy. Atalǵan jobaǵa QR Premer-Mınıstriniń orynbasary Berdibek Saparbaev joǵary baǵa berdi, dep habarlaıdy QazAqparat tilshisi.
«Barlyǵymyz Jambyl oblysynyń ekonomıkasyn jaqsy bilemiz, dotatsııalyq óńir. Halqynyń 60 paıyzdan astamy aýyldyq jerde turady. Ózin ózi jumyspen qamtıtyndardyń eń kóbi de osy Jambyl óńirinde. Onyń ishinde turaqty tabysy joq aýylda turatyndardyń da 60 paıyzy Jambyl óńirinde eken. Sondyqtan usynylǵan joba óte durys. Eń negizgisi aýylda turatyndardyń ózin ózi asyrap, turmysyn jaqsartýǵa úlken septigin tıgizedi», - dedi vıtse-premer.
Onyń atap ótýinshe, jobanyń arqasynda eń kem degende 90 myńǵa jýyq jańa jumys orny ashylady. Nátıjesinde ataýly áleýmettik kómek alatyn adamdardyń sany azaıady.
«Biz bul jobany oblys ákimdigimen birneshe ret talqyladyq. Barlyǵyn eseptedik. Biraq oblys ákimdigine aıtatyn ótinish, biz kóptegen jobalardy júzege asyrǵanymyzben keıde solardyń nátıjesine jetpeı qalamyz. Sondyqtan oblys ákimdigi muny kúndelikti baqylaýy kerek. Odan keıin ilki aýyldyq okrýgterde jaqsy nátıje bolsa, onda muny basqa óńirlerge de engizý kerek», - Berdibek Saparbaev.
