Berdibek Saparbaev tumaýǵa qarsy vaktsına saldyrdy
Aımaq basshysy №5 qalalyq emhananyń Covid-19 aýrýynyń boljaldy ekinshi tolqynyna degen daıyndyq barysyn barlady. Atalǵan mekemeniń medıtsınalyq qyzmetkerler quramy 130 adamnan turady. Emhanada pýlsoksımetrlerdiń, ottegi kontsentratorlardyń sany jetkilikti deńgeıde qalyptassa, dárilerdiń eki aılyq qory jasaqtalǵan. Munda tórt mobıldi brıgada qurylǵan desek, qajettilik týyndaǵan jaǵdaıda olardyń sany segizge deıin artpaq.
Emhananyń bas dárigeriniń orynbasary Rahat Aımurzaev aıtýynsha, tumaýǵa jáne JRVI-ǵa qarsy ekpe egý naýqany qalypty rejımde júrgizilýde. Vaktsınatsııadan bas tartqan táýelkel tobyndaǵy azamattar tirkelmegen, olarmen jan-jaqty túsindirme sharalary júrgizilýde.
Aıta ketý kerek, oblys ákimi de osy emhanada tumaýǵa qarsy ekpe saldyrdy. Ol kúzgi kezeńde JRVI men tumaýǵa shaldyǵýdyń qaýiptiligi joǵary ekendigin tilge tıek etti.
«Vaktsınatsııa - ınfektsııamen kúresýdiń tıimdi ádisteriniń biri. Ásirese, bul osy maýsymda pandemııaǵa baılanysty ózekti bolyp otyr. Ókinishke oraı, búginge deıin jambyldyqtardyń tek jeti paıyzy ǵana tumaýǵa qarsy ekpe qabyldaǵan. Bul kórsetkishti qarasha aıynyń ortasyna deıin, ıaǵnı vaktsınatsııalaý aıaqtalǵansha 40 paıyzǵa deıin arttyrý kerek», - dedi B.Saparbaev.
Oblystyq kópbeıindi balalar aýrýhanasynda oblys ákimi aýrýhana balansyndaǵy medıtsınalyq qural-jabdyqtarmen tanysty. Aımaq basshysy dári-dármekter men jeke qorǵanys quraldary saqtalatyn aýrýhana qoımasynda boyp, naýqastardy qabyldaýǵa arnalǵan súzgi posttaryn qarap shyqty.
Emdeý mekemesiniń bas dárigeri Azat Sátjanov búginde medıtsınalyq mekemede koronavırýspen aýyratyn naýqastardy emdeýge arnalǵan eki aılyq dári-dármekter qory qalyptasqanyn jetkizdi. «SK-Farmatsııa» JShS-men 266 mln.teńgege dári-dármek pen medıtsınalyq maqsattaǵy buıymdardy jetkizý boıynsha 31 kelisimshart jasalǵan.
Sondaı-aq, aımaq basshysy «Neke jáne otbasy» medıtsınalyq ortalyǵynda bolyp, onda oǵan bedeýlikti emdeý kezinde medıtsınalyq kómek kórsetý týraly baıandaldy. EKO-ǵa bólinetin kvotalar, turǵyndar úshin joǵary tehnologııalardyń qol jetimdiligi máseleleri saralandy. Medıtsınalyq ortalyqtyń basshylyǵy ákimnen emdeý sharalarynyń qol jetimdiligin qamtamasyz ete túsý úshin EKO kvotasyn kóbeıtý múmkindigin qarastyrýdy surady.
Oblys ákimi EKO zerthanasynyń jumysymen de tanysty. Medıtsınalyq ortalyqtyń basshysy Natalıa Tararaka aıtqandaı, byltyr jambyldyq 100 áıelge jergilikti bıýdjet esebinen tıisti medıtsınalyq kómek kórsetilgen. Al, bıyl 31 áıelge EKO jasalǵan desek, taǵy 11-i kezekte tur. Budan bólek, EKO protsedýrasy aqyly negizde de júzege asyrylady. Jalpy alǵanda, medıtsınalyq ortalyq jylyna 400-ge jýyq EKO qyzmetin usynady.
Oblys ákiminiń aıtýynsha, oblystaǵy árbir tórtinshi erli-zaıyptylar ajyrasady desek, oǵan ortada sábıdiń bolmaýy da keri áserin tıgizýde. Bul ýaqytyly sheshýdi qajet etetin negizgi medıtsınalyq-áleýmettik másele bolyp otyr.
«Balasyz otbasylarǵa kómektesý kerek. Kvota kólemin arttyrý máselesi medıtsınalyq mekemeniń múmkindigi men EKO protsedýrasynyń tıimdiligin eskere otyryp qarastyrylady», - dep atap ótti B.Saparbaev.
Bul kúni oblys ákimi qalanyń birneshe dárihanalaryna arnaıy bas suqty. «Sadyhan» JShS dárihanasynda dezınfektsııalyq zattar men medıtsınalyq maskalar bar bolǵanymen, suranysqa ıe birneshe dári tabylmady. «Ámir jáne D» JShS dári-dármekpen qamtamasyz etýde eshqandaı kedergiler joqtyǵyn habarlady.
Jumys saparynyń sońynda B.Saparbaev oblystyq densaýlyq saqtaý basqarmasynyń basshylyǵyna dári-dármekpen qamtamasyz etý máselesin baqylaýda ustaýdy, olardyń úzdiksiz jetkizilýin qadaǵalaýdy, sondaı-aq barlyq aýrýhanalar men emhanalardyń koronavırýstyń boljaldy ekinshi tolqynyna daıyndyǵyn tekserýdi tapsyrdy.
Oblys ákiminiń aıtýynsha, densaýlyq saqtaý salasynda aýqymdy josparlar belgilengen. Óńirde 200 medıtsınalyq mamanǵa qajettilik bar, osyǵan baılanysty dárigerlerdi daıarlaýǵa aıryqsha den qoıylyp otyr.
Osy oraıda jaqyn arada Tarazda S.D.Asfendııarov atyndaǵy Qazaq ulttyq medıtsınalyq ýnıversıtetiniń fılıalyn ashý josparlanǵan.
