Berdibek Saparbaev tarazdyqtardy ystyq sýmen qamtamasyz etýdi tezirek qalpyna keltirýdi tapsyrdy

TARAZ. QazAqparat – Jambyl oblysynyń ákimi Berdibek Saparbaev ystyq sýmen qamtamasyz etý máselesi boıynsha ótken jıynda aldaǵy birneshe kún ishinde jóndeý jumystary kezinde ystyq sýmen qamtamasyz etýdi qalpyna keltirýdiń sheshimin tabýdy tapsyrdy, dep habarlaıdy QazAqparat tilshisi.

Berdibek Saparbaev ystyq sýdyń óshýine baılanysty áleýmettik jelilerde turǵyndardyń narazylyq bildirip jatqanyn atap ótti. Odan bólek bul jaǵdaı buqaralyq aqparat quraldarynda da ózekti máselege aınalyp, qyzý talqylanýda.

– Ystyq sý tóńiregindegi mundaı keleńsizdik jylda qaıtalanyp keledi, biraq soǵan qaramastan naqty sharalar qabyldanbaıdy. Alaıda, bıylǵy jaǵdaı máz emes. Qazir kóptegen adamdar úıde karantınge qamalyp otyrǵan kezde biz olardyń densaýlyǵyna beı-jaı qaraı almaımyz. Kún saıyn maǵan Taraz turǵyndarynan ondaǵan ótinish kelip túsedi. Búgingi tańda barlyq kúsh-qýat adamdardyń ómiri men densaýlyǵyn qorǵaýǵa baǵyttalyp jatqan kezde, eshqandaı bosańsý men kemshilik keshirilmeıdi, – dedi oblys ákimi.

Energetıka jáne turǵyn úı-kommýnaldyq sharýashylyq basqarmasy basshysynyń mindetin atqarýshy Qudaıbergen Qorǵanbaevtyń aıtýynsha, ystyq sý josparlanǵan jóndeý jumystaryna baılanysty óshirilgen.

Tarazdaǵy 1312 turǵyn úıdiń 1253-i ortalyqtandyrylǵan jylý júıesine qosylǵan. Olarǵa «Tarazenergoortalyq» AQ, «Jambyl Jylý» JShS, «Sofııa» JShS, «Jambyl GRES» jáne «Taraztransenergo» memlekettik qazynalyq kásiporny qyzmet kórsetedi.

Jalpy, ystyq sý berý 1 shildeden bastap jóndeý jumystaryna baılanysty toqtatylǵan. Jylý júıesin qaıta qurý jáne jóndeý boıynsha 17 joba júzege asyrylýda.

Kelisimshart boıynsha merdigerler nysandardy qazan aıynda tapsyrýǵa mindetti. Alaıda Berdibek Saparbaevtyń bul merzimdi tym uzaq dep otyr.

– Infraqurylym nysandaryn jóndeý jáne qaıta qurý jumystary jurtshylyqtyń júrip-turýyn, kúndelikti tirshiligin qıyndatpaýy kerek. Bolmashy ǵana aýmaqty alatyn jóndeý jumystar nelikten birneshe aıǵa sozylyp ketetini túsiniksiz. Energetıka jáne turǵyn úı-kommýnaldyq sharýashylyq basqarmasy, Taraz qalasynyń ákimdigi merdigerlerdiń qyzmetin qatań qadaǵalap, jóndeý jumystaryn tezirek aıaqtaýdy talap etýi kerek, – dep tapsyrdy aımaq basshysy.

Qala ákimdigine, turǵyn úı-kommýnaldyq sharýashylyq basqarmasyna jáne «Tarazenergoortalyq» aktsıonerlik qoǵamyna jóndeýdi qajet etpeıtin qazandyqtardy qosyp, azamattardy ishinara ystyq sýmen qamtamasyz etý múmkindikterin qarastyrý tapsyryldy. Sondaı-aq jıynda bul máseleni sheshýdiń basqa da joldaryn izdestirý qajettiligi aıtylyp, naqty usynystar birneshe kún ishinde ázirlenýi kerektigi eskertildi.