Berdibek Saparbaev Tarazdaǵy sapasyz joldardy qaıta jóndeýdi tapsyrdy
TARAZ. QazAqparat – Jambyl oblysynyń basshysy Berdibek Saparbaev Tarazdaǵy sapasyz joldardy qaıta jóndeýdi tapsyrdy, dep habarlaıdy QazAqparat óńir ákimdiginiń resmı saıtyna silteme jasap.
Jýyrda Taraz qalasynda «Araı» turǵyn úı alqabynyń turǵyndary ótken jyly tóselgen asfalttyń sapasyna shaǵymdanǵan bolatyn. Jeksenbi kúni óńir basshysy atalǵan aýmaqa arnaıy baryp, merdigerdiń sapasyz jumystaryna kóz jetkizdi.
Byltyr atalǵan turǵyn úı alqabynda birneshe kóshege asfalt tóselgen bolatyn. Biraq bıyl jeti kóshedegi jol jabyny jelinip, jaryla bastaǵan. Oblys ákimimen kezdesken aýdan turǵyndary keıbir káriz lıýkteri asfalt astynda qalǵanyna da narazylyq tanytty. Óńir basshysy shaǵymdardy muqııat tyńdap, ketken kemshilikterdiń jaqyn arada túzetiletinine sendirdi.
«Qala turǵyndary jol jóndeý jumystarynyń barysyn muqııat qadaǵalap otyrady. Eger olqylyqtardy baıqasa, olardy sheshýge tyrysyp, áleýmettik jelilerge jarııalaıdy. Bul – bizdiń qoǵamdyq baqylaýymyz. Osylaısha olar jumys sapasy men merdigerlerdiń is-áreketterin baqylaýǵa kómektesedi. Sonymen birge, tehnıkalyq qadaǵalaý, TKSh mamandary neǵurlym belsendi jumys istep, jumys sapasyn tıisti deńgeıde qadaǵalaýdy qamtamasyz etýi kerek. Merdigerler, óz kezeginde, kez kelgen kemshiliktiń óz esebinen túzetiletinin túsinýleri tıis», - dep eskertti Berdibek Saparbaev.
Sonymen qatar, aımaq basshysy qaladaǵy Qoıgeldi, Abaı, Nıetqalıev, Komratova, Sypataı batyr jáne basqa da kóshelerge at basyn burdy. Munda aldyńǵy jyldary jylý magıstralin qaıta jańartýǵa baılanysty jol tósemi buzylǵan bolatyn. Alaıda, jumystar aıaqtalǵannan keıin jol jabyny tıisti túrde qalpyna keltirilmegen.
«Joldardy qalpyna keltirý sapasy nashar. Merdigerdi jáne tehnıkalyq qadaǵalaýshylardy shaqyryp, barlyq olqylyqty joıý úshin qajetti sharalar qoldaný kerek. Mundaı deńgeıdegi jumystardy qabyldaý múmkin emes», - dedi oblys ákimi.
Berdibek Saparbaev «za lınıeı» dep atalatyn aımaqtaǵy joldardyń qurylysy men jóndeý jumystarynyń barysymen de tanysty.
Jalpy «Jumyspen qamtýdyń jol kartasy» aıasynda oblys ortalyǵynda jol qurylysy boıynsha 100 joba júzege asyrylýda. Ol boıynsha qalanyń 130 kóshesi qamtylady desek, 88 shaqyrym avtojoldar men trotýarlar salynyp, jóndeledi. Bul jumystarǵa barlyǵy 3,3 mıllıard teńge bólingen.
